حکومت ہوپءَ را گرءُدار کنگءَ ہوار نیزگاریں تبکءَ را ریلیف ہم سرکنگ ءَ اِنت، مزن وزیر عمران خان

بنجاہی حکومت کورونا ءَ را گرءُ دار کنگءِ ھاترءَ درائیں صوبہ آنی کمک ءَ کنگءَ اِنت،
پشاور ۔ 10 اپریل (اے پی پی) مزن وزیر عمران خان ءَ خیبر پختونخوا ءِ گورنر ، سروزیر ءُ وزیراناں صوبہ آنی آماچیں دمگانی ترءُتا ب کنگ ءُ آسراتی سرکنگءِ پنت ءُ شون کتگ ءُ گشتگ کہ بنجاہی حکومت کورونا ہوپ ءَ را گرءُ دار کنگءِ ھاترءَ درائیں صوبہ آنی سرجمیءَ کمک ءَ کنگءَ اِںت ءُ اے کمک برجم دارگ بیت، انوگیں جاورھالان حکومت ہوپ ءَ را گرءُدار کنگءَ ہوار نیزگاریں مردمانی مدتءُکمک ہم کنگ بیت۔ اے ھیالانی درشانی آئیءَ جممعہ ءِ روچءَ حیات آباد میڈیکل کمپلیکس ءِ ترءُ تاب ءِ موہءَ کتگ۔ اے موہءَ بنجاہی وزیر اسد عمر، ملکی وزیر شہریار آفریدی، حاسیں کمک ڈاکٹر ثانیہ نشتر، خیبر پختونخوا ءِ گورنر شاہ فرمان ، سروزیر محمود خانءُ جانءُ سلامتی ءِ صوبائی وزیر ساڑی بوتگ۔ اے موہءَ خیبر پختونخوا ءِ چیف سیکرٹری ءَ کورونا ءِ ہوپ ءِ ردءَ صوبائی حکومت ءِ گامگیجانی سرءَ شونست داتگ۔ آئی ءَ گشتگ کہ صوبہ خیبر پختونخوا ءِ 6 ضلع آں کورونا ءِ ہوپ گیشتر اِنت۔ آئی ءَ گشتگ کہ صوبائی حکومت ءِ نیمگ ءَ 3 فروری ءَ کورونا ایمرجنسی کنگ بوتگ۔ گورنر ، سروزیر، جانءُ سلامتی ءِ وزیر ءُ مزنیں حکما ہمک روچ ءَ جاورھالانی چارءُ تپاسی ءَ کنگءَ اَنت۔ شونستءِ تہءَ حال دیئگ بوتگ کہ سرجمیں صوبہءَ 275قرنطینہ بنجاہ جوڑ کنگ بوتگ اَنت کہ آیانی تہءَ 18،000 مردمانی گنجائش اَست۔ سروزیر ءَ صوبائی تک ءَ 32 ارب ءِ ریلیف پیکیج ءِ جار جتگ ۔ آئی ءَ گشتگ کہ سرجمیں صوبہ ءَ 583وینٹیلیٹر است۔ ایمرجنسی ءِ ردءَ صوبہ ءَ 638ریگولر ءُ 1299کنٹریکٹ ءِ سرءَ ڈاکٹر بھرتی کنگ بوتگ۔ ایشیءَ ابید 9ہزار ریٹائرڈ ڈاکٹر، نرس ءُ پیرامیڈک سٹاف ءَ وت ءَ را رضا کار رجسٹرڈ کتگ۔ صوبہ ءَ سرکاری تکءَ 200ریپیڈ رسپانس ٹیم جوڑ کنگ بوتگ۔ مزن وزیرءَ صوبائی حکومت ءِ اے درائیں گامیگیج ساڑاتگ اَنت۔