گڑتی ءِ ہندا تُو انا ایسر اسکان کوروناوائرس نا کیس آتے ٹی ودکی مریک، حالیت آتا قوم اس جوڑمرسامقابلہ ءِ کروئی ءِ، بنجائی و صوبائی حکومت آک حالیت آتون مون تننگ کن اواری اٹ کوشست کننگ ءُ، وزیراعظم عمران خان نا بلوچستان کابینہ و صوبائی اسمبلی نا باسک آتیان تران

کوئٹہ۔ 09اپریل (اے پی پی) وزیراعظم عمران خان گڑتی ظاہر کرینے کہ ملک اٹی ہندا تُو انا ایسر اسکان کوروناوائرس نا کیس آتے ٹی ودکی مریک، کوروناغان ودی مروک حالیت آتا قوم اس جوڑ مرسا مقابلہ ءِ کروئی ءِ، بنجائی و صوبائی حکومت آک حالیت آتون مون تننگ کن اواری اٹ کوشست کننگ ءُ، ہرصوبہ ءِ حالیت آتے مون آ تخسا گام گیج کروئی ءِ۔ داخیال آتا درشانی ءِ او پنچ شنبے نادے آ بلوچستان کابینہ و صوبائی اسمبلی نا باسک آتیان تران کرسا کرے۔ وزیراعظم عمران خان پارے کہ کوروناوائرس آن ودی مروک حالیت آتا قوم اس جوڑ مرسا مقابلہ ءِ کروئی ءِ، گڑتی ءِ کہ ہندا تُو انا ایسر اسکان کوروناکیس آتے ٹی ودکی مریک، کوروناکیس آتا ودنگ آن ہسپتال آتیا بھاریم ودک۔ اوپارے کہ حالیت آتا خوڑتی اٹ جاچ ءِ ہلنگ اُن۔ نیشنل کمانڈ اینڈ آپریشن سینٹر ہڑدے ئی بنداو آ حالیت آتا جاچ ءِ ہلیک و دا بنداو آ آخبت نا گام گیج کننگک ۔ اوپارے کہ ڈاکٹرز و طبی عملہ ءِ رکھی گڑاتا فراوانی آ چکارکرینن، ڈاکٹرز و طبی عملہ ءِ جندی رکھی گڑافراوان کننگانے، اوفتا رکھ اکن ہروڑنا گام گیج کننگ انگ ءِ۔ وزیراعظم پارے کہ بلوچستان اٹی داوخت آ آئی سی یو ٹی کورونانا اسہ ناجوڑ اس ہم اف، بلوچستان اٹی بیرہ کوئٹہ گنجان آباد ءِ وخت اس کہ ایلو علاقہ غاتے ٹی آبادی مر مر آٹو ہرانا سوب آن دا علاقہ غاتے ٹی کورونانا مقابلہ ءِ کننگ آسان ءِ ولے راولپنڈی، لاہور، پشاور کون آ بھلا شارتیٹی حالیت آک خراب مننگ کیرہ۔ وزیراعظم پارے کہ ہرصوبہ ءِ حالیت آتے مون آ تخسا گام گیج کروئی مریک، لاک ڈاؤن نا سوب ہڑدے ئی اجرت آ کاریم کروک آک زہمی مننگ ءُ ، صوبہ غاک حالیت آتا رداٹ لاک ڈاؤن نا بابت فیصلہ کیرہ۔اوپارے کہ بنجائی و صوبائی حکومت آک حالیت آتون مون تننگ کن اواری اٹ کوشست کننگ ءُ، حالیت آتا اواری اٹ مقابلہ ءِ کینہ تو سرسہبی دوئی مریک۔