بلوچستان اٹی کنوئی آ گڑاتا بلاتعطل فراوانی، زرگزرانی سرجزآتا روانی نا گچین و سوگو ءُ حکمت عملی اس جوڑ کننگ کن چاہندار آتیا تالان تھنک ٹینک اس ٹہیفنگے، وزیراعظم عمران خان نا کوئٹہ ٹی اہم دیوان آن تران

کوئٹہ۔ 09اپریل (اے پی پی) وزیراعظم عمران خان صوبہ بلوچستان اٹی کنوئی آ گڑاتا بلاتعطل فراوانی و زرگزرانی سرجزآتا روانی، روزگار نا وارخواہی تا فراوانی و نیزگاری ٹی کمتی نا بابت اسہ گچین و سوگو ءُ حکمت عملی اس جوڑ کننگ نا گرج آ زور شاغسا پارت کرینے کہ دا رداٹ چندی بشخ آتون وابستہ چاہندار آتیا تالان اسہ تھنک ٹینک اس ٹہیفنگے۔ داخیال آتا درشانی ءِ او صوبہ بلوچستان اٹی کوروناوائرس نا حالیت آتا بابت حوال دیوان نا کماشی ءِ کرساکرے۔ دیوان اٹی بنجائی وزیر اسد عمر، زبیدہ جلال، گورنر بلوچستان جسٹس (ر) امان اللہ خان، وزیراعلیٰ بلوچستان جام کمال خان، وزیر تعلیم بلوچستان سردار یار محمد رند ، کمانڈرسدرن کمانڈ وسینئر آفیسر آک ساڑی ئسر۔ داوخت آ وزیراعظم ءِ صوبہ بلوچستان اٹی کوروناوائرس نا زہمی تا خیالداری، زائر آتا آسراتی کن کروک آ بست وبند، کنوئی آ گڑاتا بلاتعطل فراوانی، ڈاکٹر و طبی عملہ کن رکھی کٹس آتا فراوانی و آخبت نالائحہ عمل آ حوال تننگا۔ صوبائی حکومت نا کنڈآن ساڑی و آخبت نا ریلیف پیکج، راشن نا صوبہ نا حقدار الس اٹ بشخنگ، پارلیمنٹرینز آتا کنڈآن کورونافنڈ انا قیام، جان جوڑی نا عملہ کن جتاوڑنا استثنیٰ و چندی ہند آتیا جاری ڈس انفیکشن (جراثیم کش) مہم نا بابت کروک آ گام گیج آتیا ہم حوال تننگا۔ وزیراعظم عمران خان صوبہ ٹی کنوئی آ گڑاتا بلاتعطل فراوانی و صوبہ ٹی زرگزرانی سرجزآتا روانی، روزگارناوارخواہی تا فراوانی ونیزگاری ٹی کمتی نا بابت اسہ گچین و سوگو ءُ حکمت عملی اس جوڑ کننگ و داحکمت عملی نا پدریسہ جاچ ءِ ہلنگ نا اہمیت آ زور شاغا وپارے کہ دارداٹ چندی بشخ آتون وابستہ چاہندار آتیا تالان اسہ تھنک ٹینک اس ٹہیفنگے۔ داتھنک ٹینک نا اولیت ہموبندغ آتا کفالت و راجی آسراتی نا بابت گام گیج آتا سفارش مرے ہرا خلقت نیزگاری نا لکیر آن شیف زندءِ تیر کننگ ءُ۔ وزیراعظم کشت وکشار نا مون آ دننگ و کُن و خور انا گڑاتا فراوانی نا بابت رعایت تننگ نا اہمیت آ ہم زور شاغا۔