اسلام آباد۔ 08اپریل (اے پی پی) اسپیکر قومی اسمبلی اسد قیصر پارینے کہ کوروناوائرس جہانی ءُ چیلنج اسے، تبلیغی جماعت نا باسک آتا کمکاری نا منتواراُن، پیشن نا ملک آتیان تبلیغی جماعت نا خلقت و زائر آتا پدی اتنگ کن ہروڑگام گیج چست کننگک، الس آن خواست ءِ کہ رکھی تدابیر تیا عمل کیر انتئے کہ دین اتون مون تننگ کن ہرمکتبہ فکر انا کمکاری اہمیت تخک۔ چارشنبے نادے آ پارلیمنٹ ہاؤس اٹی او بنجائی وزیر مذہبی امور نورالحق قادری و وزیر مملکت شہریار آفریدی تون اوار ذرائع ابلاغ نا نمائندہ غاتون گپ وتران کریکہ۔ اسپیکر اسد قیصر پارے کہ تبلیغی جماعت نا باسک و غٹ زائر آتے پارلیمنٹ نا کنڈآن باوری کرفنہ کہ نن اوفتے مایوس کپنہ، جنگی بنداو تیا کاریم کینہ، مچ آ قوم نم تون تفوک ءِ، نمے مایوسی مفک، نم ہراوڑصبر وسگ انادرشانی ءِ کرینورے نن نمے خراج تحسین پیش کینہ۔ وزیر مذہبی امور نورالحق قادری پارے کہ کوروناوائرس نا دین امتحان اسے، دا بابت زائر و تبلیغی جماعت آ ہور ہرفنگا ، ولدا اسپیکر داڑآ گام ہرفے و نن تبلیغی جماعت نا شوریٰ تون ہیت کرین۔ مولانا طارق جمیل تون ہم ہیت مس۔ اوپارے کہ زائر آتون تعلقدار ویل و غلط فہمی تا بابت ہم ریاست نا کہول آ معاملہ ءِ چٹفنگ کن خلقت تون رابطہ ٹی اُن۔ اوپارے کہ شب برات بھاز برکت والونن اسے، دا رحمت والو نن اسے، داٹی ذکر وفکر اتون عبادت کننگے ولے احتیاطی تدابیر آتون تینا اُراتیٹی مریر و اللہ غان کمک خوار۔
