اسلام آباد۔ 08اپریل (اے پی پی) پارلیمانی کمیٹی نا زیلی کمیٹی مسائل تبلیغی جماعت نا چیئرمین شہریارخان آفریدی پارینے کہ پاکستان اٹ وپاکستان آن پیشن اختہ تبلیغی جماعت نا ہزار آباسک آتا اُراتیا پدی اتنگءِ ممکن جوڑ کننگک و دامسخت کن رائیونڈ اٹی وزارت داخلہ نا سیٹ اپ اس جوڑ کروئی مریک۔ داخیال آتا درشانی ءِ او پارلیمنٹ ہاؤس اٹی زیلی کمیٹی نا دیوان نا کماشی ءِ کرسا کرے۔ دیوان اٹی وزارت داخلہ ، ایوی ایشن ، جان جوڑی و خارجہ نا آفیسر آک ساڑی ئسر۔ چیئرمین پارے کہ پارلیمان حکومتی باندات آتا چاروکی نا زمواری ءِ ادا کننگ ءِ و کرساکیک۔ ننے ویل آتا ایسری کن کڑد اداکروئی مریک و زہمی تے ریلیف تروئی ءِ۔ رائیونڈ اٹی اسہ وزارت داخلہ نا سیٹ اپ اس جوڑ کروئی مریک تانکہ او تبلیغی جماعت نا زہمی تا امداد و اوفتا تینا ملک و اُراتیا پدی اتنگ ءِ ممکن کننگ مرے۔ شہریار خان آفریدی پارے کہ 1500پاکستانی مچ آ ملک اٹی اختہ ءُ۔ وخت اس کہ 1500درملکی ملک اٹی ساڑی ءُ۔ کم و ود 1800پاکستانی چندی ملک آتے ٹی اختہ مسنو۔ داغٹ انا تینا اُراتیا پدی اتنگ ءِ پک کننگ کن غٹ تعلقدار ادارہ غاتے کڑد اداکروئی مریک۔ شہریارخان آفریدی پارے کہ پیشن نا ملک آتے ٹی اختہ پاکستانی پردیسی تا پدی اتنگ کن تعلقدار مشنز و سفارتخانہ غاک فعال کڑداداکیر۔ ایوی ایشن و ایلوادارہ غاک اوفتا وطن آ پدی اتنگ ءِ زوت آن زوت ممکن کیر۔ پارلیمان پاکستانی پردیسی تا وطن آزوت آن زوت پدی اتنگ نا عمل نا چاروکی ءِ کیک۔ داوخت آ شہریار خان آفریدی تعلقدار وزارت آتا بنجائی سیکرٹری تا دیوان اٹی بشخ ہلپننگ نا نوٹس ءِ ہلسا اسپیکر آفس ءِ تعلقدار سیکرٹری صاحب آتا بروک آ دیوان اٹی بشخ ہلنگ ءِ پک کننگ ناپارت۔ تبلیغی جماعت نا سرکڑدہ غاک رائیونڈ آن بذریعہ آڈیولنک دیوان اٹی بشخ ہلکر۔ وزیر مملکت پارے کہ کالاشاہ کاکولاہور آن 400اوغان باہوٹ آتا وطن آ پدی اتنگ کن گام گیج کننگک۔
