وزیرخارجہ مخدوم شاہ محمود قریشی نا ملائیشیائی ہم منصب حشام الدین حسین ءِ ٹیل فون، کوروناوائرس نا دین اتون مون تننگ نا کوشست آتیا گپ وتران

اسلام آباد۔ 08اپریل(اے پی پی) وزیرخارجہ مخدوم شاہ محمود قریشی ملائیشیا نا وزیر خارجہ حشام الدین حسین تون ٹیل فون آ رابطہ کرے۔ ہڑتوم آ وزیرخارجہ غاک کوروناوائرس نا جہانی دین انا چیلنج و اوڑتون مون تننگ کن کروک آ کوشست آتیا گپ وتران کریر۔ وزیر خارجہ مخدوم شاہ محمود قریشی وزارت خارجہ نامنصب ءِ سنبھالنگ آ حشام الدین حسین ءِ مبارکبادی تس۔ چارشنبے نادے آ ترجمان دفترخارجہ نا رداٹ وزیرخارجہ دا جہانی دین اتون ملائیشیا ٹی مروک آ جانی نسخان تیا ڈکھ و است ہسونی نا درشانی ءِ کرے۔ وزیرخارجہ دامشکل ساہت اٹی ، ملائیشیا ٹی رہینگوک آ پاکستانی تا خصوصی خیال ءِ تخنگ آ ملائیشیا نا وزیر خارجہ نا منت واری ءِ ہرفے۔ وزیرخارجہ مخدوم شاہ محمود قریشی داجہانی دین انا تالانی ءِ توننگ و داجہانی چیلنج اتون مون تننگ نا بابت ملائیشین حکومت نا کنڈآن کروک آ وخت آ گام گیج آتا ستاءِ کرے۔ وزیرخارجہ دادین انا تالانی ءِ توننگ کن پاکستان نا کنڈآن کروک آ کوشست آتیان، تینا ملائیشین ہم منصب ءِ معلومدارکرے۔ وزیر خارجہ ساڑی آ دینی رداٹ، نزور زرگزران تے مون تروک مشکل آتا رداٹ، وزیراعظم عمران خان نا کنڈآن شون پذیر ملک آتا واجب الادا وام تا ری اسٹرکچرنگ نا سلاہ غان تینا ملائیشیائی ہم منصب ءِ معلومدار کرے۔ شاہ محمود قریشی پارے کہ شون پذیر ملک آتا وام تا ری اسٹرکچرنگ آن اوفتے تینا وسیلہ غاتے، دا جہانی چیلنج اتون مون تننگ و نہادی انسانی جان تے بچفنگ کن کاریم اٹ اتنگ نا موقع دوبریک۔ ملائیشیائی وزیرخارجہ وام تا ری اسٹرکچرنگ نا بابت، وزیراعظم عمران خان نا سلاہ نا خیرمقدم ءِ کرسا دامعاملہ ءِ جی 20ملک آتون ہرفنگ نا عندیہ تس شاہ محمود قریشی تینا ہم منصب ءِ مقبوضہ جموں و کشمیر اٹی جاری انسانی حق انا سنگین خلاف ورزی تیان معلومدارکرسا پارے کہ کودک کشمیریک، تدوک آ 8تُوآن بدترین کرفیو تون مون تننگ ءُ۔ مخدوم شاہ محمود قریشی پارے کہ اسہ کنڈآ ہراتم دنیا تینا چکار ءِ، داجہانی دینی چیلنج انا کنڈآ کرینے بھارت ڈومیسائل آن تعلقدار قاعدہ و ضابطہ ءِ بدل کرسا مقبوضہ کشمیر اٹی آبادی نا تناسب ءِ بدل کننگ اٹ لگوک ءِ ہرانئے بیرہ جہانی کانودنا خلاف ورزی ءِ بلکن اقوام متحدہ سیکورٹی کونسل نا قرارداد آتیان ہم چپ ءِ۔ 80لکھ کودک کشمیری تے بھارتی استبداد آن بچفنگ کن جہانی برادری ءِ تینا کڑد ءِ اداکروئی مریک۔ ہڑتوم آ وزیرخارجہ غاک ساڑی جہانی دینی حالیت آتون اہم باندات آتیا سلابت ءِ برجاتخنگ نا فیصلہ ءِ کریر۔