اسلام آباد۔ 08اپریل (اے پی پی) وزیر خارجہ مخدوم شاہ محمود قریشی سنگاپور نا وزیر خارجہ وویان بالا کرشنن تون ٹیل فون آ رابطہ کرے۔ ہڑتوم آ وزیرخارجہ غاتا نیام اٹ کوروناوائرس نا تالانی ءِ توننگ و داجہانی چیلنج اتون مون تننگ نا بابت سرجم گپ وتران مس۔ ترجمان دفترخارجہ نا رداٹ وزیر خارجہ شاہ محمود قریشی پارے کہ کورونا دین انا تالانی ءِ توننگ کن، سنگاپور ہراچاہنداری اتون وخت آ گام گیج ہرفینے اوستاکڑزرہ۔ وزیر خارجہ سنگاپور اٹی رہینگوک آ پاکستانی تا وطن آ پدی اتنگ کن خصوصی کمکاری فراوان کننگ آ سنگاپور حکومت نا منت واری ءِ ہرفے وزیر خارجہ تینا شاری تے وطن آ پدی اتنگ اٹ کمک فراوان کننگ آ وزیر خارجہ مخدوم شاہ محمود قریشی نا منت واری ءِ ہرفے۔ شاہ محمود قریشی تینا ہم منصب ءِ دا دینی چیلنج اتون مون تننگ کن پاکستان نا کنڈآن کروک آ کوشست آتیان ہم معلومدارکرے و پارے کہ کورونا دین انا تالانی ءِ توننگ کن سنگاپور نا کنڈآن جوڑ کروک آ موبائل ایپلیکیشن ‘‘ٹریس ٹوگیدر’’ستاکڑزک وپاکستان سنگاپور نا دا سرسہب آزموندہ غان فائدہ دوئی کننگ نا پبی کوشست کننگ ءِ۔ شاہ محمود قریشی پارے کہ دا جہانی دینی رداٹ، کم وسیلہ تخوک آ زرگزران تے شدید مشکل آتون مون تروئی تمنگ ءِ ہنداحالیت آتا رداٹ وزیراعظم عمران خان شون پذیر ملک آتا واجب الادا وام تا ری اسٹرکچرنگ نا سلاہ ءِ تسنے تانکہ دا ملک آک تینا وسیلہ غاتے دا جہانی آفت اتون گچین وڑاٹ مون تننگ و نہادی انسانی جان تے بچفنگ کن کاریم اٹ اتنگ کیر۔ شاہ محمود قریشی پارے کہ نے اومیت ءِ کہ سنگاپور دا سلاہ ءِ مون آ دننگ اٹ ننا پبی کمک ءِ کیک۔ وزیر خارجہ مخدوم شاہ محمود قریشی سنگاپور نا دورہ نا سلہ ءِ تننگ آ، تینا ہم منصب ڈاکٹر بالا کرشنن نا منت واری ءِ ہرفسا پارے کہ او حالیت آتے ٹی گچینی بننگ آ زوت سنگاپور نا دورہ ءِ کیک۔ ہڑتوم آ وزیر خارجہ غاتا دا جہانی دینی چیلنج اتون مون تننگ و ایلو اہم باندات آتیا سلابت ءِ برجاتخنگ نا فیصلہ ءِ کریر۔
