اسلام آباد۔ 08اپریل (اے پی پی ) احساس ایمرجنسی کیش پروگرام اکن چارشنبے نا سہب اسکان 4کروڑ 30لکھ44ہزار60ایس ایم ایس رسینگانو۔ وزیراعظم نا خصوصی کمکار انسداد نیزگاری و رکھ ڈاکٹر ثانیہ نشتر دا چرجوئی ٹی اسلام آباد اٹی مزور آتون احساس ایمرجنسی کیش پروگرام نا بابت گپ وتران کرے و اوفتا ویل آتے بنگ۔ اوپروگرام اٹی خواری کش ومزور آتا اوار کننگ ءِ پک کننگ کن رضارکار آتاکمک ءِ ہلنگ نا ہم فیصلہ ءِ کرے تانکہ او حقدار آتے کن 8171آ اوفتا شناختی کارڈ نمبر ءِ ایس ایم ایس کننگ کیر تانکہ زیات آن زیات حقدار بندغ آک پروگرام آن فائدہ ہرفنگ کیر۔ ڈاکٹر ثانیہ نشتر داوخت آ گپ وتران کرسا پارے کہ احساس کیش پروگرام پاکستان نا تاریخ نا غٹ آن بھلا کمکی پیکج ءِ۔ ہرانا رداٹ اسہ کروڑ 20لکھ خاہوت آتے کن 12000روپئی فی خاہوت تننگک۔ سرکاری ملازم و تینا گاڈی تخوک آک داپروگرام آن فائدہ ہرفنگ نا اہل افس۔پروگرام نا رداٹ پیسہ غاتا ادائیگی نا مرکز نا کچ اٹ ودکی کننگ انگ ءِ تانکہ خلقت نا رش مف۔ اسہ وار تروک آ دا امداد ہمو بندغ آتے کن ءِ ہرافتا زرگزرانی حالیت کوروناوائرس نا سوب آن بھاز بے وڑ زہمی مسنے تانکہ او تینا اُراوالا تیکن راشن ہلنگ کیر۔ دا پروگرام بے کچ ضرورت مند آتے کن ءِ۔ دارداٹ اگہ ویل اس مون تروک مرے تو ٹال فری نمبر 080026477آ رابطہ کننگ مریک۔ میسج اٹ تینا 13 ہندسہ غاتیا تالان قومی شناختی کارڈ نمبر ءِ نوشتہ کرسا 8171آ گدریفسا دا پروگرام آن فائدہ ہرفنگ مریک۔ یات سلے کہ حکومت پاکسان نا کنڈآن احساس ایمرجنسی کیش پروگرام آ عمل ترندی اٹ برجاءِ۔ پروگرام آن ہر چار آ صوبہ غاتیان بیدس کشمیر و گلگت بلتستان نا بندغ آک فائدہ ہرفرہ۔ احساس کفالت پروگرام والا زالبول آتے ہم چار تُو اکن 12ہزار روپئی یکمشت ادا کننگک۔ ہلہلہ ئی کیش پروگرام کن آبادی نا لحاظ اٹ زر جتا کننگانے انتئے کہ داٹی گلگت بلتستان و کشمیر ہم اوار ءُ۔ صوبہ غاک تینا بجٹ اٹی ہم حقدار بندغ آتا کمک ءِ کیرہ۔ صوبہ پنجاب 7لکھ و سندھ دونیم لکھ خلقت ءِ پیسہ تینا بجٹ آن ایترہ۔ داکان بیدس ضلعی کہول آ ضرورت مند بندغ آتا فہرستاس جوڑ کننگ انگ ءِ۔ ہلہلہ ئی کیش پروگرام نا جانچ پڑتال ناگچین ءُ وڑوڈول اس تیناکننگانے و دا مچ آ عمل اٹ شفافیت ءِ پک کننگانے۔ سٹیٹ بینک انا کمکاری آن ڈیٹایکجا کننگانے۔ حقدار بندغ آتے بائیومیٹرک شناخت آن پد زر فراوان کننگک و داڑکن سیل پوائنٹس مقرر کننگانے۔ نادرا و شراکتی بینک آتا کمک اٹ غٹ غٹ زرتس آتے بائیو میٹرک پک آ مبنی نظام نا کمک اٹ کننگک۔ و حقدار شراکتی بینک آتا پوائنٹ آف سیل ہند و اے ٹی ایم مشین تیان تینا پیسہ غاتے ہلنگ کیرہ۔
SMH
