اسلام آباد۔ 08اپریل (اے پی پی) چیئرمین سینیٹ صادق سنجرانی امریکی حکومت تون کروناوائرس نا جہانی دین آن زوال آتیا ڈکھ و است ہسونی نا درشانی ءِ کرسا پاکستان نا کنڈآن کمکاری ناسلہ ءِ خلکونے۔ چارشنبے نادے آ چیئرمین سینیٹ نا کنڈآن امریکی صدر ڈونلڈ ٹرمپ و امریکی سینیٹ نا سروک مائیکل پنس ءِ نوشتہ کروک آ چھٹی تیٹی چیئرمین سینیٹ کوروناوائرس آن مروک آ مرک آتیا است ہسونی نا درشانی ءِ کرے۔ داکان مست چیئرمین سینیٹ جرمن چانسلر سپین و اٹیلی نا وزیراعظم آتے ہم چھٹی مون تسنے۔ چیئرمین سینیٹ چھٹی ٹی نوشتہ کرینے کہ امریکہ ٹی کوروناوائرس نا سوب آن مروک آ مرک آتیا بھاز است ہسونی مسنے، پاکستان نا پارلیمنٹ و الس نا کنڈآن زہمی خاہوت آتون دلی ہڑزخواہی و است ہسونی نا درشانی ءِ کیوہ۔ صادق سنجرانی پارے کہ کوروناوائرس اسہ بھلو جہانی ءُ چیلنج اسے ہراڑآن ہر اسہ بندغ زہمی مسنے۔ داتنکی آن ہراڑے بھس کاری مننگ ءِ ہموڑے اقوام عالم ءِ یکجا مننگ نا اسہ جتا ءُ موقع اس دوبسنے۔ اوپارے کہ پاکستان دنیا آنبار راجی فاصلہ و احتیاطی تدابیر تیا سختی اٹ عمل کننگ ءِ۔ پاکستان نا پارلیمان و قوم دامشکل وخت اٹی نم تون تفوک ءُ۔ نن ہروڑنا کمکاری خاص وڑاٹ پیرامیڈیکل سپورٹ فراوان کننگ کن تیار اُن۔ اوپارے کہ اومیت ءِ کہ اسیجا کوشست آتے اٹ نن زوت دا تنکی نا مون ءِ تورنہ ۔ ڈکھ انا داساہت اٹی کنا است خواہیک نم تون ءُ۔
