کوروناریلیف ٹائیگر فورس اٹ رجسٹرڈ ورناتا کچ 8لکھ انا خڑک سرمسنے، وزیراعظم عمران خان نا است جمی نا درشان، فورس ءِ صوبائی کہول آدمدستی متحرک کننگ نا پارت

اسلام آباد۔ 07اپریل (اے پی پی) بنجائی کابینہ ءِ وزیراعظم کوروناریلیف ٹائیگر فورس انا بابت تازہ انگا رپورٹ پیش کرسا پاننگانے کہ فورس اٹی رجسٹرڈ ورناتاکچ 8لکھ انا خڑک سرمسنے۔ وزیراعظم عمران خان رپورٹ آ است جمی نا درشانی ءِ کرسا کوروناریلیف ٹائیگر فورس ءِ صوبائی کہول آ دمدستی وڑاٹ متحرک کننگ نا پارت کرینے۔ سے شنبے نادے آ بنجائی کابینہ نا دیوان اٹی وزیراعظم ءِ کوروناریلیف ٹائیگر فورس انا آپریشنل باندات آتاجاچ ءِ ہلنگا۔ وزیراعظم نا خصوصی کمکار امور نوجوانان عثمان ڈار کابینہ نا باسک آتے کوروناریلیف ٹائیگر فورس انا بابت تازہ حساب وکتاب آ حوال تس۔ وزیراعظم عمران خان رپورٹ آ است جمی نا درشانی ءِ کرسا فورس ءِ صوبائی کہول آ دمدستی وڑاٹ متحرک کننگ ناپارت کرے۔ حوال اٹی پاننگاکہ ٹائیگر فورس انا لائیو اپ ڈیٹ ءِ کووڈ۔19نا سرکاری ویب سائٹ آ پبلک کننگا۔ خصوصی کمکار عثمان ڈار بنجائی کابینہ ءِ پارے کہ ٹائیگر فورس اٹ رجسٹرڈ ورناتاکچ 8لکھ انا خڑک سرمسنے، رجسٹرڈ ورناتے ٹی غٹ آن زیات کچ طالب علم و سوشل ورکرز آتاءِ، انجینئرز، استاد، وکیل و کارپوریٹ سیکٹر تون وابستہ بندغ آک ہم ٹائیگر فورس اٹ اوار ءُ۔ ڈاکٹرز، صحافی ، سیاسی کارندہ، این جی اوز و ریٹائرڈ آرمڈ فورس اتون وابستہ بندغ آک ہم رجسٹریشن اٹ بشخ ہلکونو۔ اوپارے کہ پنجاب آن رجسٹرڈ ورناتاکچ 5لکھ آن زیات ءِ، سندھ آن اسہ لکھ 11ہزار پختونخواآن اسہ لکھ2ہزارورنا، اسلام آباد آن 10ہزار، بلوچستان آن 9ہزار و آزاد کشمیر آن 8ہزار ورنافورس اٹ بشخ ہلکونو۔ وزیراعظم عمران خان پارے کہ ورناک مشکل وخت اٹی قومی جوزہ نا پبی درشانی ءِ کننگ ءُ ، ورناتے صوبائی و ضلعی کہول آ زوت متحرک کننگے۔