پاکستان نا پارلیمنٹ و الس نا کنڈآن زہمی خاہوت آتون ہڑزخواہی
اسلام آباد۔ 06اپریل (اے پی پی) چیئرمین سینیٹ محمد صادق سنجرانی کوروناوائرس نا جہانی دین آن زہمی ملک آتا راہشون حکومت نا سروک آتے چھٹی اس نوشتہ کرینے۔ سینیٹ سیکرٹریٹ نا رداٹ چیئرمین سینیٹ کوروناوائرس نا سوب مروک آ زوال آتیا پاکستان نا پارلیمنٹ و الس نا کنڈآن ڈکھ و است ہسونی نا درشانی ءِ کرسا پارینے کہ کوروناوائرس اسہ بھلو جہانی ءُ چیلنج اسے ہراڑآن ہر اسہ بندغ زہمی مسنے ۔ چیئرمین سینیٹ نا کنڈآن نوشتہ کروک آ چھٹی نا متن اٹ پاننگانے کہ دا تنکی آن ہراڑے تباہی مسنے ہموڑے اقوام عالم ءِ یکجا مننگ نا اسہ یکتا ءُ موقع اس دوبسنے۔ ایوان بالا نا چیئرمین جرمن چانسلر، سپین و اٹلی نا وزیراعظم آتے چھٹی اس نوشتہ کرے و پاکستان نا کنڈآن ہروڑنا کمکاری نا سلہ خلک۔ چیئرمین سینیٹ نا کنڈآن بیلاروس نا کونسل آف ری پبلک (قومی اسمبلی) نا اسپیکر، پولینڈ نا مارشل آف سینیٹ و برونائی دارالاسلام نا پاکستان اٹ سفیر ءِ ہم چھٹی نوشتہ کننگا۔ چیئرمین سینیٹ پارے کہ کوروناوائرس نا سوب مرک آتیا بھاز دل گرفتہ اُٹ۔ چیئرمین سینیٹ پاکستان نا پارلیمنٹ و الس نا کنڈآن زہمی خاہوت آتون ہڑزخواہی و است ہسونی نا درشانی ءِ کرے۔ چیئرمین سینیٹ محمد صادق سنجرانی پارے کہ پاکستان دنیاآنبار راجی فاصلہ و احتیاطی تدابیر تیا سختی اٹ عمل کننگ ءِ۔ اوپارے کہ پاکستان نا پارلیمان و الس دامشکل وخت اٹی نم تون تفوک ءُ و ہروڑنا کمک و پیرامیڈیکل کمک فراوان کننگ کن تیار ءِ۔ چیئرمین سینیٹ پارے کہ اومیتءِ کہ اسیجا کوشست آتے اٹ نن زوت دا تنکی نا مون ءِ تورنہ۔ ڈکھ انا دا ساہت اٹی کنا است خواہیک نم تون ءُ۔ چیئرمین سیینٹ مارشل آف سینیٹ پولینڈ نا کنڈآن اودے مون تروک آ پولینڈ نا دورہ نا سلہ غا منت واری ءِ ہرفے و پارے کہ ساڑی حالیت آتا رداٹ دورہ مننگ کتو، حالیت آتا سہی مننگ آ پارلیمانی رابطہ و دورہ غاتے ری شیڈول کننگک۔
