اسلام آباد۔ 06اپریل (اے پی پی) تاشقند اٹی پاکستانی سفارتخانہ نا کمامدارآک پاکستان انٹرنیشنل ایئرلائن(پی آئی اے) نا خصوصی جہاز انا کمک اٹ ازبکستان اٹی اختہ مروک آ پاکستانی تے وطن آ پدی گدریفے۔ دوشنبے نادے آ داڑے ملوک آ پریس ریلیز نا رداٹ تاشقند اٹی پاکستانی سفارتخانہ پی آئی اے نا خصوصی جہاز انا کمک اٹ ہموڑے اختہ 128پاکستانی شاری تے جمہوریہ ازبکستان آن وطن آ پدی گدریفینے۔ انسانی ہمدردی نا رداٹ ہندا جہاز انا کمک اٹ پاکسان آن 22ازبک شاری تے ہم پدی گدریفنگانے۔ دااختہ مروک آ پاکستانی شاری تیٹی ہموسیل و سواتیک اوار ئسر ہرا چنکووخت اسے نا ویزہ غا جمہوریہ ازبکستان آ ہناسر و کوویڈ۔19نا دین آن پد جہانی جہاز آتا معطلی نا سوب آن اوپدی بننگ کتویسر۔ ازبکستان اٹی اڈکننگ نا وخت آ سفارتخانہ، تاشقند داپاکستانی تا پورو تندرستی ءِ پک کننگ کن غٹ المی گام گیج آتے کرے۔ سفارتخانہ دابھازانگا ہم وطن آتے کُن وخور، ہنکین و دوائی تس۔ سفارتخانہ نا غٹ عملہ پاکستان آ پدی بننگ نا وخت آ تاشقند انٹرنیشنل بالی پٹ آ ساڑی ئس تانکہ دامسافر آتے ہروڑنا تکلیف آتیان بچفنگ مرے۔ پاکستانی سفارتخانہ تینا شاری تا آسانی اٹ وطن آپدی بننگ ءِ پک کننگ کن حکومت ازبکستان نا غٹ تعلقدار کمامدار آتا کمکاری آ منت واری ءِ ہم ہرفے۔
