اسلام آباد۔ 06اپریل (اے پی پی) وزیراعظم نا خصوصی کمکار حوالکاری و شینکاری ڈاکٹر فردوس عاشق اعوان پارینے کہ احساس کیش ایمرجنسی پروگرام وزیراعظم عمران خان نا نیزگار، مزور و خواری کش تپہ غاتون مہرومریبت و احساس نا درشانی ءِ، دا پروگرام محروم تپہ غاتا زرگزرانی مشکل آتے مر کننگ اٹ کمکار مریک، ہندا ہفتہ حقدار آتے داپیسہ غاتا ملنگ نا چرجوئی بناکیک، حقدار آک شراکتی بینک آتیان پیسہ غاتے ہلنگ کیرہ ، داکان بیدس صوبائی حکومت آتون اواری اٹ ودکی کاؤنٹرآتا بست وبند ءِ ہم کننگ اُن۔ دوشنبے نادے آ تینا ٹویٹ اٹی خصوصی کمکار ڈاکٹر فردوس عاشق اعوان پارے کہ پوسکن آ پاکستان نا ایجنڈا احساس و الس نا خذمت ءِ، کیش پروگرام نا رداٹ 144ارب روپئی 1کروڑ20لکھ خاہوت آتےٹی بشخنگک۔ حقدار خاہوت آتے 12ہزار روپئی یک مشت تننگک۔ اوپارے کہ الس ءِ ریلیف تننگ نا دا تاریخی گام انا بھرم ہر چار آ صوبہ، گلگت بلتستان و آزاد جموں و کشمیر نا حقدار اُراتسکان سرمریک۔ ڈاکٹر فردوس عاشق اعوان پارے کہ کمک نا فراوانی کن جانچ پڑتال نا گچین ءُ وڑوڈول اس تینا کننگانے تانکہ شفافیت نا عمل آ ہچ کس ہورہرفنگ کپ، ہندا ہفتہ حقدار آتے دا پیسہ غاتا ملنگ نا چرجوئی بناکیک، حقدار آک شراکتی بینک آتیان پیسہ غاتے ہلنگ کیرہ داکان بیدس صوبائی حکومت آتون اواری اٹ ودکی کاؤنٹرآتا بست وبند ءِ ہم کننگ اُن۔
