اسلام آباد۔ 06اپریل (اے پی پی) کوروناوائرس آ پارلیمانی کمیٹی نا دیوان دوشنبے نادے آ اسپیکر قومی اسمبلی اسد قیصر نا کماشی ٹی پارلیمنٹ ہاؤس اٹی مس۔ دیوان اٹی وزیر خارجہ شاہ محمود قریشی، راجہ پرویز اشرف، شبلی فراز وزیر خزانہ حماد اظہر ، شیخ رشید ، سینیٹر مشاہد اللہ ، غفور حیدری و سینیٹر شیری رحمان ئسک ساڑی ئسر۔ کمیٹی ءِ این ڈی ایم اے نا سروک جنرل افضل ووزیراعظم نا خصوصی کمکار جان جوڑی ڈاکٹر ظفر مرزا ئسک حوال تسر۔ دیوان اٹی کمیٹی نا ٹی او آر ءِ پیش کننگا۔ اسپیکر پارے کہ داوخت آ غٹ سیاسی سرکڑدہ غاتے یکجا مننگ نا گرج ءِ۔ چیئرمین این ڈی ایم اے جنرل افضل پارلیمانی کمیٹی ءِ حوال ترسا پارے کہ ملک اٹی 3800آن زیات وینٹی لیٹر ساڑی ءِ۔ 2200پبلک سیکٹر و ایلو پرائیویٹ سیکٹر تون ارے۔ 9اپریل آ پین 500وینٹی لیٹرز پاکستان آ سرمریک۔ چین آن پین 2ہزار وینٹی لیٹر خواہفنگک۔ ڈاکٹر و پیرامیڈیکل اسٹاف کن 29ہزار رکھی کٹس صوبہ غاتے تننگانے۔ مچ آ ملک اٹی 137ہسپتال آتے کوروناوائرس کن جتا کننگانے۔ غٹ ہسپتال آتا سروک آتے پی آر سی کٹس پنچ شنبے آن گدریفنگک۔ مچ آ ملک اٹی 22لیبارٹری کاریم کننگ ءُ۔ وینٹی لیٹرآپریٹرز آتا کچ اٹ ودکی کن راولپنڈی، لاہور وکراچی ٹی ڈاکٹرآتے تربیت تننگک۔ داوخت اسکان 35ہزار ٹیسٹ مسنے۔
