اسلام آباد۔ 06اپریل (اے پی پی) وزیراعظم نا سلاہکار خزانہ و محصولات ڈاکٹر عبدالحفیظ شیخ کوروناوائرس نا دین اتون مون تننگ اٹ پاکستان نا الس تون کمکاری آ جاپان نا حکومت نا منت واری ءِ ہرفینے۔ داہیت ءِ او دوشنبے نادے آ داڑے پاکستان اٹی جاپان نا سفیر کونی نوری مسوداتون اوڑدہی ٹی گپ وتران کرساپارے۔ جاپان نا سفیر وزیراعظم نا سلاہکار ءِ کوروناوائرس تون مون تننگ کن جاپان نا حکومت نا کنڈآن داوخت اسکان چست کروک آ گام گیج و اوفتا جم اٹنگا اثرآتیان معلومدار کرے۔ اوپارے کہ جاپان ناحکومت مشکل نا داساہت آتے ٹی پاکستان ءِ کمک فراوان کننگ ءِ، جاپان ضرورت تمنگ آ و حکومت پاکستان نا خواست آ چاہندار آتا دروشم اٹ ایلو نوعیت ناکمک فراوان کننگ کن تیار ءِ۔ جاپانی سفیر وزیراعظم نا سلاہکار تون جاپانی زرکارآتا ہمو ویل آتیا گپ وتران کرے ہرا کوروناوائرس نا دین انا سوب آن واپاری و زرگزرانی اڑاند آتا سوب ودی مسنے۔ وزیراعظم نا سلاہکار پاکستان اٹ دین انا مون ءِ توننگ نا کوشست آتے ٹی کمکاری آ جاپان نا حکومت نا منت واری ءِ ہرفے۔
