اسلام آباد۔ 06اپریل (اے پی پی) وزیر خارجہ مخدوم شاہ محمود قریشی پارینے کہ پاکستان، شنگھائی کمکار تنظیم ءِ اسہ اہم ءُ فورم اس سرپند کیک، دین انا تالانی ءِ توننگ کن شنگھائی کمکار تنظیم نا پلیٹ فارم نا کمک اٹ اسیجا کوشست آتے کاریم اٹ اتنگ نا گرج ءِ ۔ وزیر خارجہ دوشنبے نادے آ شنگھائی کمکار تنظیم نا سیکرٹری جنرل ولادی میر نوروف تون ٹیل فون آ رابطہ کرے۔ ہڑتوم آ راہشون تا نیام اٹ کوروناوائرس نا جہانی دین انا تالانی ءِ توننگ و داجہانی چیلنج اتون مون تننگ کن گچین ءُ لائحہ عمل اس تینا کننگ نا بابت سرجم گپ وتران مس۔ ترجمان دفترخارجہ نا رداٹ وزیر خارجہ سیکرٹری جنرل ایس سی او ءِ دا جہانی دین انا چیلنج اتون مون تننگ کن پاکستان نا کنڈآن کروک آ کوشست آتیان معلومدار کرے۔ وزیر خارجہ پارے کہ پاکستان، شنگھائی کمکار تنظیم ءِ اسہ اہم ءُ فورم اس سرپند کیک انتئے کہ دانا باسک ملک آتا آبادی ، دنیا نا آبادی نا چل درسد آن زیات و جی ڈی پی ، اسہ چارکی بشخ اس جوڑ مریک۔ اوپارے کہ مچ آ دنیا داوخت آ کوروناوائرس نا دین اتون مون تننگ ءِ دادین انا تالانی ءِ توننگ کن شنگھائی کمکار تنظیم ناپلیٹ فارم نا کمک اٹ اسیجا کوشست آتے کاریم اٹ اتنگ نا گرجءِ۔ تانکہ دا دین انا انسداد کن گچین ءُ حکمت عملی اس تینا کننگ مرے۔ وزیر خارجہ شاہ محمود قریشی پارے کہ چین ہراوڑ داجہانی دین ءِ شکست تسنے او ستاکڑزک۔ ننے چین انا آزموندہ غاتیان فائدہ ہرفوئی مریک۔ چین، کوروناوائرس نا دین اتون مون تننگ کن پاکستان نا بھاز کمک ءِ کننگ ءِ۔ شاہ محمود قریشی پارے کہ چین نا دا جہانی چیلنج اتون مون تننگ کن تینا کروک آ حکمت عملی و لائحہ عمل نا وخت آ تشہیر، ایس سی او سیکرٹری نا بے کچ اہم ءُ گام اسے۔ وزیر خارجہ کوروناجہانی دینی چیلنج اتون مون تننگ کن، یکم اپریل 2020ء آ بٹنگوک آ ایس سی اووزرائے جان جوڑی کانفرنس نا ستاءِ کرسا دا دین انا توننگ کن اسیجا حکمت عملی اس تینا کننگ و اسیجا کوشست آتے کاریم اٹ اتنگ نا گرج آ زور شاغا۔ اوپارے کہ پاکستان سارک ملک آتا وزرائے جان جوڑی ویڈیو کانفرنس نا اڈتننگ ناممتنی ءِ تانکہ کوروناوائرس نا دین انا بابت اسہ ایلو نا آزموندہ غاتیان فائدہ ہرفنگ مرے۔ وزیر خارجہ سیکرٹری جنرل ایس سی او ءِ ساڑی جہانی دینی رداٹ، شون پذیر ملک آتا زرگزران تے سیبو تننگ کن اونا ذمہ واجب الادا وام تا ری سٹرکچرنگ نا بابت پاکستان نا سلاہ غان معلومدار کرے۔ وزیر خارجہ پارے کہ دا بابت کنا سیکرٹری جنرل اقوام متحدہ ، سیکرٹری جنرل او آئی سی و یورپی ملک آتا وزرائے خارجہ غاتون اوار ، بھاز انگا ملک آتا وزیر خارجہ غاتون رابطہ مسنے و وننا سلاہ غا مثبت ردعمل نا درشانی ءِ کرینو۔ اوپارے کہ ننے اومیت ءِ کہ شنگھائی کمکار تنظیم تینا پلیٹ فارم نا کمک اٹ ، وام تا ری اسٹرکچرنگ نا سلاہ ءِ مون آ دننگ اٹ پبیءُ کڑد اس اداکیک۔ سیکرٹری جنرل شنگھائی کمکار تنظیم شون پذیر ملک آتا وام تا ری اسٹرکچرنگ نا بابت وزیراعظم عمران خان نا سلاہ نا ستاءِ کرسا پارے کہ شون پذیر ملک آتا زرگزرانی کمکاری وخت انا اہم ءُ گرج اسے ، اوباوری کرفے کہ شنگھائی کمکار تنظیم سیکرٹریٹ دا دین انا تالانی ءِ توننگ کن غٹ گمانی کوشست آتے کاریم اٹ اتساکیک۔ وزیر خارجہ سیکرٹری جنرل شنگھائی کمکار تنظیم ءِ حالیت آتا مہالو آنبار بننگ آن پد دورہ پاکستان نا سلہ خلک ہرادے او منت واری اتون امنا کرے۔
