اسلام آباد۔ 03اپریل (اے پی پی) وزیراعظم عمران خان پارینے کہ کورونانا چیلنج دیکی آن جتاءِ، مچ آ ملک ءِ لاک ڈاؤن کننگ کپنہ، نن 1200ارب روپئی نا ریلیف پیکج اس تسونن، ہراڑآن لس بندغ نا ساڑی حالیت آتے ٹی مشکل آتے کم کننگ مریک، خلقت ءِ روزگار تننگ کن کشت وکشار آن پد ارٹ میکو بھلا سیکٹر تعمیرات ءِ، شعبہ تعمیرات ءِ انڈسٹری نا درجہ تننگ والااُن، و تعمیرات کن کنسٹرکشن انڈسٹری بورڈ اس جوڑ کننگ انگ ءِ، تعمیراتی بشخ ءِ 14اپریل آن ملنگک، داسال تعمیراتی بشخ اٹ زرخلوک آڑان ذرائع آمدن نا ہریفنگپک، فکسڈ خراج نافذ کننگک ہراڑآن خراج دزی ٹی کمتی مریک، پوسکن آ پاکستان ہاؤسنگ اسکیم کن سی ارب نا سبسڈی تننگ اُن، ہچ کس داسمجھپ کہ پاکستان اٹی کورونانا خطرہ اف۔ داخیال آتا درشانی ءِ او جمعہ نادے آ داڑے تعمیرات نا بشخ اکن پیکج نا پڑو ءِ کرساکرے۔ اوپارے کہ کورونا مچ آدنیاٹی چیلنج اس مسنے ، پاکستان اٹی کورونانا چیلنج دیکی آن جتا ءِ۔ دیکی ٹی اسہ کنڈآکوروناءِ تو ایلو کنڈآ زرگزران ءِ و پاکستان اٹی اسہ کنڈآکوروناو ایلو کنڈآبین ءِ۔ وزیراعظم پارے کہ چین ووہان ءِ پورو وڑاٹ اِراتواکن لاک ڈاؤن کرے، پاکستان اٹ لاک ڈاؤن نا مطلب ءِ کہ نیزگار آبادی تے بند کننگ ناءِ۔ ہنداخاطرآن مچ آ ملک ءِ لاک ڈاؤن کننگ کپنہ۔ اوپارے کہ نن کوروناغان ودی مروک آحالیت آتارداٹ لس بندغ ءِ ریلیف تننگ کن 1200ارب روپئی نا پیکج اس تسونن، ہموخاہوت ہرافتا ذریعہ معاش زہمی مسنے، ءِ کمک رسینگک۔ اوپارے کہ پاکستان اٹ اسہ کروڑ بندغ پیکج ہلنگ کن رجسٹرڈ مسنو ہراڑکن حکومت اسہ جامع پیکج اسے نا پڑو ءِ کرینے۔ اوپارے کہ پاکستان اٹ کشت وکشار نا بشخ پورو وڑاٹ ملوک ءِ و چنکا بھلا شارتیٹی ریسٹورنٹ آتیان کُننگ نا گڑادننگ نا موکل ءِ۔ داڑتون اوار اوار مال بردارٹرانسپورٹ ءِ ہم ملوک تخنگانے۔ اوپارے کہ ہمو ہند آتیا پورو لاک ڈاؤن خلنگانے ہراڑے الس نا یکجا مننگ نا گڑتی ءِ دُن کہ اسکول، کالجز، برام و گوازی تا پڑک ءُ۔ اوپارے کہ داوخت آ اندازہ خلنگ مفک کہ وائرس اخہ ترندی اٹ تالان مریک ولے ہچ کس دا سمجھپ کہ پاکستان اٹ کورونانا خطرہ اف۔ اوپارے کہ کشت وکشار آن پد تعمیرات ارٹمیکو بھلا بشخ ءِ، ننا است خواہی ءِ کہ خلقت ءِ روزگار تننگ کن دا بھلا بشخ ءِ ریلیف تننگے انتئے کہ نن خوانہ کہ تعمیراتی بشخ اتون وابستہ مزور آتے روزگار ملے۔ وزیراعظم پارے کہ تعمیراتی بشخ ءِ ملنگ آن روزگار نا وارخواہی ودک، نن فیصلہ کرینن کہ داسال تعمیراتی بشخ اٹ زرکاری کروک آتیان کٹیا نا ذرائع نا ہریفنگپک، تعمیراتی سیکٹر آفکسڈ خراج خلنگ اُن، سیمنٹ و اسٹیل انڈسٹری آ ودہولڈنگ خراج لاگو مریک۔ اوپارے کہ پوسکن آپاکستان ہاؤسنگ اسکیم کن سی ارب نا سبسڈی تننگ اُن، ہراخاہوت تینا اُراءِ سودا کننگ خواہک تو اوڑآخراج لگپک۔ صوبہ غاتون اواری اٹ خراج چھوٹ تننگ اُن۔ اوپارے کہ تعمیرات نا بشخ ءِ انڈسٹری نا درجہ تننگ والااُن و تعمیرات کن کنسٹرکشن انڈسڑی بورڈ اس جوڑ کننگ انگ ءِ۔ وزیراعظم پارے کہ تعمیراتی بشخ ءِ 14اپریل آن ملنگک۔ داڑتون اوار اوار تعمیرات تون تعلقدار بشخ آتے ملنگ انگ ءِ۔ اوپارے کہ حالیت آتا ہڑدے ئی نا بنداو آ جاچ ءِ ہلنگک۔ پاکستان اٹی ہشتاد درسد مزور رجسٹرڈ افس ہرافتا رجسٹریشن المی ءِ۔ وزیراعظم پارے کہ بیست کروڑ خلقت ءِ بند کننگ کپنہ۔ پورو لاک ڈاؤن آن لاء اینڈّآرڈرنا حالیت ودی مننگ نا خطرہ ءِ۔ ڈیفنس وگلبرگ ءِ بند کننگ آن لاک ڈاؤن سرسہب مفک، لاک ڈاؤن ہمووخت آ سرسہب مریک ہراتم کچہ انگا آبادی و نیزگار آتا محلہ غاتے بند کننگے داوڑکننگ مفک و داڑکن سجفوئی مریک کہ انت نن نیزگار آتا بنداوی گرج آتے پورو کننگ کینہ، انت نن کچہ انگا آبادی تیٹٛی نیزگار آتے ارغ سرکننگ کینہ ، قوم ءِ فیصلہ کروئی ءِ کہ وائرس نا مقابلہ ءِ امر کروئی ءِ۔ داوخت آ وزیراعظم نا سلاہکار خزانہ ڈاکٹر عبدالحفیظ شیخ پارے کہ اینخو نا سال حکومت نا کنڈآن 82لکھ ٹن خولم ہلنگک۔ اوپارے کہ پٹرول و ڈیزل نا نہاد آتے ٹی 15روپئی فی لیٹر کمتی آن متوسط تپہ ءِ بھاز فائدہ مریک۔ اوپارے کہ خراج ری فنڈ انا مد اٹ 100ارب روپئی کاروباری برادری ءِ پدی تننگانے۔ وزیراعظم پارے کہ پرائیویٹ اسکول آتا فیس تا بابت پالیسی اس جوڑ کننگ اُن، کوروناریلیف فنڈ نزور تپہ کن تننگانے۔ اوپارے کہ اختلاف ہموفتیان ءِ ہراکرائسز ءِ کرپشن اودیم کننگ کن کاریم اٹ اتیرہ۔
