واشنگٹن۔ 26 فروری (اے پی پی) پنی آ امریکی آن لائن جریدہ ڈپلومیٹ اقوام متحدہ نا سیکرٹری جنرل انتونیوگوتریس نا چاردے ئی دورہ پاکستان ءِ وزیراعظم عمران خان نا حکومت نا اہم ءُ سرسہبی اس گوندسا پارینے کہ عمران خان ملک ءِ مون تروک اقتصادی و زرگزرانی ویل آتون مون تننگ تون اوار اوار کشمیر نا ویل آ تینا بیانیہ ءِ مون آ دننگ ءِ و انتونیوگوتریس نا سرسہب دورہ غان نئے بیرہ اونا حکومت نا است بڈی مسنے بلکن تینٹ عمران خان نا پنی مننگ اٹ ودکی خننگانے۔ رپورٹ نار داٹ عمران خان تینا خارجہ پالیسی نا وت انا وڑاٹ دامان اٹی کشمیر نا ویل و بھارت نا کریک ڈاؤن نا معاملہ ءِ آخبتی وڑاٹ زندہ تخانے۔ اقوام متحدہ نا سیکرٹری جنرل نا دورہ ٹی جہانی امن و چاگڑدی بدلی تیٹی پاکستان نا کڑد انا بابت اونا بیان تا مچ آ دنیا نا میڈیا کوریج ءِ کرے۔ انتونیوگوتریس آن پد ترک صدر رجب طیب اردوان پاکستان نا دورہ ءِ کرے ہراٹی او پارے کہ کشمیر نا ویل آ پاکستان تون پبی یکجہتی نا درشانی ءِ کرے۔ بھارت دا یکجہتی نا درشانی آ ہراوڑ ترک صدر نا برخلاف ردعمل تس داوڑنا ردعمل او انتونیوگوتریس نا بارواٹی تننگ کتو۔ رپورٹ نار داٹ مستین اٹی بھارت اٹی بھارتیہ جنتا پارٹی نا حکومت نا پالیسی تا برخلاف سخت موقف اختیار کپننگ آ مسلم لیگ (ن) نا حکومت نکتہ چینی نا گواچی ئسک، 2016ء ٹی کشمیر اٹی برہان وانی نا خون آ بیرہ مذمت نا لوز آتیان کاریم ہلنگا۔ داکان بیدس مسکوہی وزیراعظم شنگھائی کمکار تنظیم اٹی کشمیر نا باندات ءِ زوردار وڑاٹ پیش کننگ اٹ ہم بے سہب مسوسس۔
