اسلام آباد ۔ 23فروری (اے پی پی) پاکستان ءَ زبان آں رکینگ ءِ ناں زندگ کنگءِ ضلورت اِنت، سرج میں ملک ءَ لینگویسٹک سروے کنگ بہ بیتء ُ یک لسانی پالیسی جوڑ کنگ بہ بیت ۔ آئیءَ گشتگ کہ وہدے کہ لینگویسٹک سروے کنگ نہ بیت گڑا لسانی پالیسی جوڑ نہ بیت ۔ اے ھیالانی درشانی علامہ اقبال اوپن یونیورسٹی ءِ پاکستانی زبانی آنی پڑءِ بلوچیء ُ براہوئی ءِ استاد ڈاکٹر ضیاء الرحمنءَ یک شمبے ءِ روچءَ 23فروری ءَ پی این سی اے ءَ برجم داشتگیں پاکستانءِ ماتی زبان آنی سے روچگیں میڈہءَ کتگ ۔ اے درگتءَ آئیءَ پشتوء ُ بلوچی ءِ لسانی شریداریءِ ہوالگءَ ء ُ ماتی زبان آنی ہوالگءَ وتی مقالہ پیش کتگ ، آئیءَ وتی سیشنءَ گشت کہ پشتوء ُ بلوچی چہ یکیں ٹِک ء ُ یکیں جغرافیہءَ سیادی داراں ء ُ دوئیں زبان گوں یکے ءَ نزیکی داراں ، چیا کہ دوئیں زبان زبان ہندیورپین ءِ ہند ایرانی شاہ ءَ گوں سیادی داراں ۔ دوئیں زبان صوتی، بتل ء ُلوک ادب ءِ بازیں ترآنی ہوالگ ءَ یکے دومی ءَ گوں نزیکی داراں ۔ آئیءَ گیش گشتگ کہ بلوچی ء ُ براہوئی ءَ کہ یکے دومی ءَ نزیکی است ہمے وڑءَ پشتوء ُ بلوچیءَ ہم بازیں لبز گوں یکے نزیکی داراں ء ُ یک وڑ اَنت ۔ آئیء َ گشتگ کہ پاکستانءَ لسانی یکوئیء ُ لسانی ہم آہنگی ءِ گپ باز بیت بلے وہدے کہ لسانی شریداری ءِ سرءَ مقالہ نبشتہ کنگ نہ بیت ، پٹء ُ پول کنگ نہ بیت اے درسیں کار زوال بنت ۔ آئی ءَ گوشت کہ ملک ءَ زبان آں رکینگ ءِ ناں زندگ کنگءِ ضلورت اِنت ۔
