بیجنگ۔ 11 فروری (اے پی پی) چین اٹی تدوک آ 24گھنٹہ ٹی کورونا وائرس آن زہمی 103 بندغ نا زوال کننگ آن پد جم وڑاٹ دا وائرس آن زوال کروک آتا کچ 1016مسنے۔ ایلو کنڈ آ چینی کمامدارآتا پاننگ ءِ کہ تدوک آ دے کورونا وائرس آن زہمی پین 2500کیس مون آ بسنو و زہمی تا کچ 42ہزار 600 اسکان ہنانے سرمسنے۔ بیجنگ اٹی محکمہ جان جوڑی نا کمامدارآک سے شنبے نادے آ جاری کروک تازہ حساب وکتاب اٹی پارینو کہ ہانگ کانگ و مکاؤ آن پیشن 42ہزار 638 بندغ کورونا وائرس نا گواچی مسنو۔ تدوک آ بیست ءُ چار گھنٹہ ٹی پین 103 بندغ دا وائرس نا سوب آن زند آن دوتے سلانو۔ چین آن بیدس ایلو 30 جاگہ غاتیا کورونا وائرس آن زہمی بندغ آتا کچ 460 آن گدرینگانے، ہرافتے آن 2بندغ اسہ فلپائن و ایلو ہانگ کانگ اٹی زوا ل کرینے۔ داڑے وائرس آ پٹ وپول اٹی کمک کن جہانی ادارہ جان جوڑی (ڈبلیو ایچ او) نا ٹیم چین آ سرمسنے۔
