کوالالمپور۔ 04 فروری (اے پی پی) وزیراعظم عمران خان پارینے کہ کانود نا حکمرانی پاکستان اٹ مدام بھلو ویل اس مسنے، زوراک بندغ، اجارہ دار پڑک و سیاسی مافیاک تینے کانود آن ایڑترتکسا و مرضی اٹ نہاد آتے ودفرہ و نیزگار نا استحصال ءِ کیرہ، پاکستان ءِ اسلامی فلاحی ریاست اس کننگ کن ننے اوفتا مقابلہ ءِ کروئی ءِ، مہاتیر محمد ننکن رول ماڈل اسے، ملائیشیا نا راج سگ انا سفت آتیان مالامال ءُ، کوالالمپور سروک نا دیوان نا مسخت مچ آ دنیا ٹی اسلاموفوبیا نا اسیجا مقابلہ ءِ کروئی ئس، مسلم دنیا نا سرکڑدہ غاک دیکی ءِ اسلام نا حقی دروشم ءِ نشان تننگ اٹ بے سہب مسنو، انتہاپسند پروپیگنڈا نا کمک اٹ ورناتے گمراہ کننگ انگ ءِ، دہشت گردی نا اسلام تون ہچ ءُ تعلق اس اف۔ سے شنبے نادے آ داڑے انسٹیٹیوٹ آف ایڈوانس اسلامک سٹیڈیز اٹ کلیدی تران کرسا وزیراعظم پارے کہ پاکستان نا بابت قائد اعظم محمد علی جناح نا وژن کنا وژن ءِ۔ قائد اعظم محمد علی جناح برصغیر نا عظیم ءُ لیڈر اس ئس، رسول پاک مدینہ نا ریاست نا بنداو ءِ تخا۔ اوپارے کہ مدینہ نا ریاست انسانی تاریخ اولیکو فلاحی ریاست ئس، مدینہ نا ریاست اٹ انصاف و بریبری ءِ بنداوی حیثیت دوئی ئس، پاکستان نا تصور ہم مدینہ نا ریاست نا وڑاٹ ئس، بدبختی اٹ وخت اتون نن تینا سہی کنڈآن اسہ کنڈ مسن۔ وزیراعظم پارے کہ حکومت ہیلتھ انشورنس پروگرام نا بناءِ کرینے ہرانا رداٹ 60 لکھ خاہوت آتے درمان نا مفت آسراتی کن جان جوڑی کارڈ تننگانے، نیزگاری نا چٹفنگ کن گام گیج کننگ انگ ءِ، نیزگار انگا بندغ آتے مالی کمک فراوان کننگ انگ ءِ و اوفتے ساہدار، کسبی تربیت دوئی کننگ و ایلو آسراتی تے ہم فراوان کننگ انگ ءِ تانکہ ذہین و راج انا نزور بندغ آتے مفت خور و ہنکین کن 200 شیلٹر ہوم تفنگانے۔ اوپارے کہ نیزگار و ہزگار نا نیام اٹ پرخ ءِ کم کننگ کنا مسخت ءِ، کانود نا حکمرانی نن کن ملک انا اسہ ویل اس مسنے، ننا ملک اٹی زوراک بندغ، اجارہ دار پڑک، سیاسی مافیا ءُ ہراتینے کانود آن ایڑتر تکرہ و تینا مرضی اٹ نہاد آتے ودفرہ و نیزگار بندغ آتا استحصال ءِ کرسا کرینو، ننے اوفتا مقابلہ ءِ کروئی ءِ، دا پاکستان کن کنا وژن ءِ، ای پاکستان ءِ اسہ حقی ءُ اسلامی فلاحی ریاست اس ہُننگ خواوہ۔ اوپارے کہ ملکی تاریخ اٹی اولیکو وار ورناتے میرٹ آ وام و تعلیمی وظیفہ تننگ انگ ءِ۔ چین نا مثال ننا مون آٹے ہراکروڑ آ بندغ آتے نیزگاری آن کشا، ننا ملک انا راج اٹی ہزگار تپہ تینے کانود آن ایڑتر تکک، و بدبختی اٹ ننا ملک اٹی چندی مافیا جوڑ مسنو۔ ڈاکٹر مہاتیر محمد ننکن قابل تقلید شخصیت اسے، اوملائیشیا ءِ شون ہلوک ملک آتا صف اٹ سلفینے۔ اوپارے کہ مذہب نا تعلق انسان نا است آتون مریک۔ ملائیشیا ٹی نن سگ انا کلچر ءِ مون آ ہنسا خنان۔اوپارے کہ اسلاموفوبیا نا اسہ سوب ایران اٹی انقلاب نا بابت دیکی نا غلط فہمی ئس۔ معلون سلمان رشدی نا کتاب مسلمان تیٹی ردعمل ودی کرے ہرادے دیکی پہہ مننگ کتو، مسلم دنیا نا سرکڑدہ غاک دیکی ءِ دا سرپند کننگ اٹ بے سہب مسر کہ ناموس رسالت نا معاملہ مسلمان تیکن اخہ در اہمیت تخک، ملائیشیا نا راج سگ انا سفت آتیان مالامال ءُ، مذہب ءِ زبردستی ہچ کس آ مسلط کننگ مفک، مدینہ نا ریاست اٹی ہم مذہبی ہم آہنگی ئس۔ وزیراعظم پارے کہ اودے دسمبر اٹ ملائیشیا غا بروئی ئس، ملائیشیا سروک نا دیوان نا مسخت مچ آ دنیا ٹی اسلاموفوبیا نا اسیجا مقابلہ کننگ کن حکمت عملی اس تیار کروئی ئس، دا چرجوئی ٹی کنا مہاتیر محمد و ترک صدر رجب طیب اردوان تون ہم ہیت وگپ مسنے۔ اوپارے کہ منہ ڈوہدار بندغ نائن الیون آ جلہو کرفیر، دا دہشت گرد جلہو آتا اسلام تون ہچ ءُ تعلق اس اف ولے مسلم سرکڑدہ دیکی دنیا ءِ دا وخت آ ہم سرپند کننگ کتو، اسلام و دہشت گردی ءِ جتا کننگ نامعاملہ ءِ ہرفنگ نا جاگہ غا اسلامی انتہاپسندی کون آ لوز آتا کاریم اٹ اتنگ نا بناءِ کریر۔ اوپارے کہ ننے اسلام و دہشت گردی ءِ جتا کرسا نشان تننگ نا گرج ئس۔ دیکی ٹی اسلام و اونا تعلیمات آتا بارواٹی خلقت ءِ آگاہ کننگ ناگرج ءِ، دیکی ٹی پیدوار کروئی ئس کہ انتہاپسندی، خودکش دھماکہ غاتا اسلام اٹی ہچ ءُ تصور اس اف۔ اوپارے کہ ننے ورناچین ءِ اسلامی راج انا حقی تصور آن روشنا س کرفنگ نا گرج ءِ، داہیت ءِ پاننگ نا گرجءِ کہ اسلامی نظریہ انت اسے۔ دیکی آ پیدوار کننگ نا گرج ءِ کہ نن تینا پیغمبر تون ہرا حد اسکان والہانہ مہر و مریبت کینہ، سوشل میڈیا نا سوب آن اطلاعات و معلومداری اسکان رسینگ اٹ انقلاب اس بسنے، انتہاپسند پروپیگنڈا نا کمک اٹ ورناتے گمراہ و اوفتا ذہن تے خرا ب کیرہ ننے دانا مقابلہ کن حکمت عملی اس جوڑ کروئی مریک۔
