بنجائی وزیر توانائی و پٹرولیم نا مانکرائے ٹی دونیم کروڑ روپئی نا خڑچ آن سوئی گیس انا فراوانی ڈٹ انا بناءِ کننگ آ السی مچی آن تران
ہری پور۔ 03 فروری (اے پی پی) بنجائی وزیر توانائی و پٹرولیم عمر ایوب خان پارینے کہ خراب زرگزران نا زموار مسکوہی حکومت آک ءُ۔ نناحکومت ءِ خورک خزانہ ملانے۔ بنجائی حکومت زرگزران نا گچینی کن غٹ وسیلہ غاتے کاریم اٹ اتنگ ءِ۔ حلقہ نا جوڑ جاڑ و شونداری کن غٹ وسیلہ غاتے کاریم اٹ اتنگ اُن۔ ارب آ روپئی نا خڑچ آن میگا ڈٹ آتیا ترندی اٹ کاریم برجاءِ۔ مر مر انگا علاقہ غاتے سوئی نا فراوانی ءِ پک کننگک۔ ضلع ہری پور ءِ ماڈل ضلع اس جوڑ کننگک۔ داخیال آتا درشانیءِ او مانکرائے ٹی دونیم کروڑ روپئی نا خڑچ آن سوئی گیس انا فراوانی نا ڈٹ انا بناءِ کننگ نا وخت آ السی مچی آن تران اٹی کرے۔ السی مچی آن مسکوہی صوبائی وزیر یوسف ایوب خان، مسکوہی باسک ضلع کونسل نجف علی، مسکوہی تحصیل باسک ملک استیاق آن بیدس ایلو ترانکار آک ہم تران کریر۔ بنجائی وزیر عمر ایوب خان پارے کہ بنجائی حکومت ملک اٹی معاشی حالیت آتے گچین آن گچین کننگ کن غٹ وسیلہ غاتے کاریم اٹ اتنگ ءِ۔ مسکوہی حکومت نا ہیبدار زرگزرانی پالیسی تا سوب آن ملک ءِ ناقابل تلافی نسخان مسنے۔ زرگزران نا خراب حالیت آتا زموار مسکوہی حکومت ءِ۔ اوپارے کہ حلقہ ٹی ارب آ روپئی نا ڈٹ آتیا کاریم برجاءِ۔ بجلی نا ویل آتے ایسر کننگ انگ ءِ۔ غازی و خانپور نا مر مر انگا علاقہ غاتے سوئی گیس انا فراوانی کن کاریم برجاءِ۔ انشاء اللہ سوئی گیس انا فراوانی نا چرجوئی برجاسلک۔ الس نا ویل آتے ایسر کننگک۔ الس نا پت آ پورو سلنہ نن اسہ ٹیم اسے نا دروشم اٹ ضلع نا ویل آتے ایسر کننگ اُن۔ سرائے صالح، خانپور، گندف و کھولیاں ٹی 132KV نا گریڈ اسٹیشن تیا ہم کاریم برجاءِ۔ ہراڑان بجلی نا ویل آک ایسر مریرہ و وولٹیج نا کمتی نا ویل ہم ایسر مریک۔
