اسلام آباد۔ 03 فروری (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ پاکستان و ملائیشیا ٹی خڑکی برادرانہ تعلقداری ءِ، ہرافتا بنداو مذہب، دودوربیدہ و تین پہ تینی پت آ جوڑ ءِ، ملائیشیا نا وزیراعظم مہا تیر محمد نا تدوک آ سال یوم پاکستان آ بننگ و پریڈ نا وخت آ مہمان خاص نا حیثیت اٹ بشخ ہلنگ ہڑتوم آ ملک آتا سنگتی نا درشانی ءِ۔ ڈاکٹر فردوس عاشق اعوان دوشنبے نادے آ تینا ٹویٹ اٹی پارے کہ وزیراعظم عمران خان نا منصب ءِ سنبھالنگ آن پد ملائیشیا نا ارٹ میکو دورہ ہڑتوم آ ملک آتا نیام اٹ مون آ ہنوک آ ہڑتوم آ کنڈآتا سوگو تعلقداری تا سوب ءِ۔ اوپارے کہ وزیراعظم عمران خان نا دورہ ہڑتوم آ ملک آتا اقتصادی رابطہ غاتے پین سوگو کیک و اسٹریٹجک پارٹنر شپ ءِ پین سوگوی رسینگک، اسیجا پریس کانفرنس اٹ ہڑتوم آ سرکڑدہ غاک ہڑتوم آ کنڈآتا تعلقداری تے پین سوگو کننگ نا بابت تینا وژن ءِ ایترہ۔ اوپارے کہ وزیراعظم عمران خان مقبوضہ جموں و کشمیر اٹی انسانی حق انا سنگین خلاف ورزی تیا ملائیشیا نا سرکڑدہ ءِ معلومدار کیک و تنازع کشمیر نا پرامن ایسری نا اہمیت آ زور شاغک۔ اوپارے کہ ملائیشیا نا مظلوم کشمیری تا منصفانہ حق استصواب رائے کن توار بڑز کننگ ستاکڑزک۔ وزیراعظم مہاتیر محمد نا کشمیر آ موقف اونا اسہ انصاف پسند جہانی راہشون اس مننگ نا شاہدی ءِ۔
