جامعہ بلوچستان نا وائس چانسلر پروفیسر ڈاکٹر محمد انور پانیزئی نا بلوچستان کاپر گولڈ پروجیکٹ نا سینئر کوارڈنیٹر رحمت اللہ بلوچ تون اوڑدہی ٹی گپ و تران

کوءٹہ ۔ 31جنوری (اے پی پی) بلوچستان کاپر گولڈ پروجیکٹ نا سینئر کوارڈنیٹر رحمت اللہ بلوچ اسہ ڈل اسے تون اوار جامعہ بلوچستان نا دورہ ءِ کرے ۔ اوجامعہ بلوچستان نا وائس چانسلر پروفیسر ڈاکٹر محمد انور پانیزئی تون اونا چیمبر اٹی اوڑدہی کریر ۔ داوخت آ جامعہ نا پرووائس چانسلرز ڈاکٹر محمد عالم مینگل، ڈاکٹر سعود تاج، جیند خان جمالدینی، جامعہ نا رجسٹرار ولی الرحمان تون اوار ایلوفک ہم ساڑی ئسر ۔ داوخت آ جامعہ بلوچستان نا تعلیمی، پٹ وپولی سرجز، صوبہ نا معدنی کوڑی، اسیجا وڑاٹ آزموندہ ئی و پٹ وپولی کمکاری تون اوار چندی باندات آتیا گپ و تران کننگا، و اوفتے پاننگاکہ جامعہ بلوچستان منرالوجی و جیالوجی تون اوار چندی بشخ آتے ٹی صوبہ نا طالب علم آتے بڑزکو تعلیم نا وارخواہی مہیا کننگ ءِ ہر سال بھلو کچ اسے ٹی طالب علم آک فارغ مرسا ہندا بشخ آتے ٹی تینا خذمت آتے سرانجام تننگ ءُ ۔ و آخبت اٹ کاپر گولڈ پروجیکٹ و صوبہ نا ایلو معدنی وسیلہ غاتیا اسیجا وڑاٹ پٹ وپولی و آزموندہ ئی کوشست آتے کاریم اٹ اتنگک ۔ وائس چانسلر داوخت آ کاپر اینڈ گولڈ پروجیکٹ نا سینئر کوارڈنیٹر نا منت واری ءِ ہرفسا پارے کہ او آخبت اٹ جامعہ تون چندی ڈٹ و جامعہ نا طالب علم آتے ہیلکاری ، آزموندہ ئی وارخواہی تتون اوار چندی پروجیکٹ آتے ٹی یکجا کاریم کننگ کن اہم وارخواہی مہیا کرے، وپارے کہ صوبہ بلوچستان قدرتی وسیلہ غاتیان مالامال اسہ اہم ءُ صوبہ اسے ۔ گرج دا ہیت انا ءِ کہ نن دا قدرتی وسیلہ غاتیان فائدہ ہرفسا ملک و صوبہ نا تقدیر ءِ بدل کننگ کینہ ۔ و جامعہ ناپولکار و پٹ وپولی مواد آتے کاریم اٹ اتسا دا ڈٹ آتے ٹی گچین آن گچین نتیجہ اخذ کننگ مریک و صوبہ نا ورناتے کن روزگار نا وارخواہی ودی کننگ مریک ۔ داکان پد سینئر کوارڈنیٹر ءِ جامعہ نا سینٹر آف ایکسیلنس اینڈ منرالوجی ، شعبہ جیالوجی و ایلو بشخ آتا لیبزو، لیبارٹری تا معائنہ ءِ کرفنگا ۔ ڈل جامعہ بلوچستان نا تعلیمی ، پٹ وپولی سرجزآتے صوبہ کن اہمیت نا حامل گوندسا پارے کہ جامعہ تون چندی پروجیکٹ آتے اسیجا وڑاٹ کمکاری و شریداری عمل آخبت کن اہم ءُ پیش رفت اس مریک ۔ و دا بابت جامعہ تون پورو کمک کننگک و جامعہ نا راہشونی ، آزموندہ ئی عمل ءِ صوبہ نا وسیلہ غاتے کاریم اٹ اتسا شونداری کن کاریم اٹ اتنگک ۔ اووائس چانسلر نا کوشست آتا ستاءِ کریر و منت واری ءِ ہرفیر ۔ ایسر اٹ وائس چانسلر مہمان تے جامعہ نا کنڈآن اعزازی شیلڈ پیش کرے ۔