اسلام آباد ۔ 31جنوری (اے پی پی) بنجائی وزیر تعلیم و کسبی تربیت شفقت محمود پارینے کہ ساڑی حکومت یونیورسٹی تیکن فنڈ آتا فراوانی کن پرعزم ءِ ، ہراوخت اسکان پوسکن ءُ نظام اس جوڑ کننگپک ، مچ آ سرکاری ادارہ غاک پنشن نا بھاریم نا کیرغ آن مریرہ ۔ یکم اپریل 2021ء آن ملک اٹی پرائمری نا اسہ وڑ نصاب تعلیم لاگو مریک ۔ جمعہ نادے آ ایوان بالا ٹی وقفہ سوج آتے ٹی سینیٹر مشتاق احمد، سینیٹر عثمان کاکڑ و ایلو باسک آتا سوج آتا ورندی ٹی شفقت محمود پارے کہ غٹ یونیورسٹی تا باندات آک داسہ صوبائی حکومت آتا دنگ اٹ بریرہ، خیبر پختونخوا ٹی جوڑ یونیورسٹی تیٹی وائس چانسلر آتا تقرری نا زمواری صوبائی حکومت نا ءِ، دا چرجوئی ٹی بھرتی نا عمل ءِ زوت پورو کننگک ۔ اوپارے کہ تدوک آ حکومت نا دور آن مست چندی یونیورسٹی تیکن فنڈ جتا کننگاکہ ولے او پیسہ غاک جاری متورہ ۔ اوپارے کہ شونداری سرجز آتے کن ہم ننا حکومت 29 ارب روپئی جتا کرینے ہرافتے آن داوخت اسکان 14ءُ نیم ارب روپئی جاری مسنے وخت اس کہ مسکوہی حکومت آخیریکو سال اٹی 30 ارب روپئی جتا کریسس و بیرہ 18 ارب روپئی جاری کرے ۔ اوپارے کہ نن دا مسخت کن مسکوہی حکومت نا آخیریکو سال انا مقابلہ ٹی تدوک آ سال 11 ارب روپئی زیات زر جتا کرینے ۔ ہنداوڑ ننا کوشست ءِ کہ بیرہ یونیورسٹی تیکن فنڈ جتا کننگپ بلکن اوجاری ہم مریر ۔ حکومت احساس پروگرام نا رداٹ سرکاری یونیورسٹی تیکن پنچ ارب روپئی جتا کرینے ۔ اوپارے کہ ننا ملک اٹی چندی نظام تعلیم راءج ءِ و قومی نصاب کونسل غٹ صوبہ غاتا سلابت اتون اسہ اسیجا نصاب نا تیاری نا عمل نا بناءِ کرینے ۔ دا چرجوئی ٹی مسودہ غا سلاہ ہلنگ آن پد قومی کہول انا کانفرنس اٹی اودے پیش کننگک ۔ قومی نصاب نا اولیکو مرحلہ ہندا سال مارچ اٹ تیار مریک ۔ یکم اپریل 2021ء آن مچ آ ملک اٹی پرائمری نا اسہ وڑ نصاب تعلیم لاگو مریک ۔ اوپارے کہ ہرازبان اٹ ہرا سرحال ءِ خوانفنگے، دا بابت کمیٹی اس جوڑ کننگانے ہرا سلابت آن پد تینا سلاہ و سوج آتے پیش کیک ۔
