مقبوضہ بیت المقدس ۔ 23جنوری (اے پی پی) اقوام متحدہ اسرائیلی ریاست نا کنڈآن فلسطین نا علاقہ غزہ نا پٹی آ خلوک آ اقتصادی پابندی بے بے سوب گوندسا اوفتے دمدستی ہرفنگ نا خواست کرینے ۔ مرکز حوالکاری فلسطین نا رداٹ اقوام متحدہ نا سیکرٹری جنرل نا ترجمان سٹیفن دوجارک نیویارک اٹی اسہ پریس کانفرنس اسے ٹی پارے کہ غزہ نا پٹی آ خلوک آ پابندی تیان لکھ آ فلسطینی مشکل آتا پلویڑ اٹی ءُ ۔ ترجمان نا پاننگ ءِ کہ ہراوخت اسکان فلسطینی و اسرائیل نا نیام اٹ سیاسی جھیڑہ غاتا ایسر اس کشنگپک ہمووخت اسکان جہانی برادری ءِ فلسطینی تا غٹ بشخ آتے ٹی کمک ءِ کروئی مریک ۔ اقوام متحدہ نا عہدیدار پارے کہ اقوام متحدہ مقبوضہ فلسطینی ڈغار اٹ تینا زمواری تے پورو کننگ نا عزم انا درشانی ءِ کیک ۔ جہانی ادارہ جہانی برادری آن خواست کیک کہ او غزہ نا پٹی نا ناکہ بندی ءِ چٹفنگ کن اسرائیل آ زور شاغے و فلسطینی علاقہ غاتے ٹی خلوک آ پابندی تے چٹفنگے ۔
