کوءٹہ ۔ 22جنوری (اے پی پی) گورنر بلوچستان امان اللہ خان یاسین زئی تون وزیراعظم نا خصوصی کمکار حوالکاری وشین کاری ڈاکٹر فردوس عاشق اعوان اوڑدہی کرے ۔ اوڑدہی ٹی صوبہ ٹی ساڑی آ پِر و برف آن مروک آ جانی و مالی نسخان تا ازالہ ءِ کننگ، امداد و بحالی نا سرجزآتے تی ترندی اتنگ، امن و ایمنی نا جم حالیت و صوبہ ٹی برجا شونداری ڈٹ آتیا گپ و تران کننگا، داوخت آ چائنا پاکستان اقتصادی راہداری ٹی رونما مروک آ اقتصادی و واپاری بدلی و سی پیک آن پاکستان و خاص وڑاٹ بلوچستان نا شونداری و شونہالی آ مرتب مروک آ اثرآتیاہم گپ و تران مس، داوخت آ گورنر بلوچستان پارے کہ ہروڑنا ہلہلئی حالیت آتون مون تننگ کن چندی ہند آتیا آخبتی بنداوتیا غٹ المی مشینری تا دستیابی ءِ پک کننگ بھاز المی ءِ ۔ خصوصی کمکار حوالکاری و شین کاری پارے کہ بنجائی حکومت برف آن مروک آ جانی ومالی نسخان تیان نئے بیرہ جوانی اٹ معلومدار ءِ بلکن اوفتا بحالی کن ہم پبی گام گیج کننگ ءِ، اوپارے کہ بھاز زوت جانی نسخان و ٹھپی تے معاوضہ تننگک، بلوچستان ءِ ناگہانی حالیت آتون مون تننگ کن دہ ملین ڈالر نا مشینری ہم فراوان کننگک، داوخت آ ساڑی سلیمان خان کاکڑ نا خذمت آتا ستاءِ کرسا ڈاکٹر فردوس عاشق اعوان پارے کہ سلیمان خان تینا جان ءِ خطرہ ٹی شاغسا ایلو انسان تا جان ءِ بچفسا اسہ مثال اس قائم کرے، اوڑدہی ٹی سیاسی و راجی شخصیت ابرار الحق ٹیل فون نا کمک اٹ گورنر بلوچستان ءِ بحالی سرجزآتے ٹی تینا پبی کڑد ءِ ادا کننگ نا باوری کرفے ہراڑا گورنر اونا منت واری ءِ ہرفے ۔
