ڈیووس ۔ 22جنوری (اے پی پی) وزیراعظم عمران خان تون سسٹم، ایپلیکیشنز ، پراڈکٹ (سیپ) کمپنی نا چیف ایگزیکٹو آفیسر کرسٹین کلین جہانی اقتصادی فورم نا سالانہ دیوان نا وخت آ داڑے اوڑدہی کرے ۔ داوخت آ وزیراعظم نا سلاہکار خزانہ ڈاکٹر عبدالحفیظ شیخ ، وزیراعظم نا سلاہکار واپار عبدالرزاق داءود ، وزیراعظم نا خصوصی کمکار سید ذوالفقار عباس بخاری، وزیراعظم نا خصوصی کمکار ڈاکٹر معید یوسف، سفیر درملکی زرکاری علی جہانگیر صدیقی ئسک ہم ساڑی ئسر ۔ سیپ انا چیف ایگزیکٹو آفیسر پارے کہ اونا کمپنی حکومت پاکستان نا تنخواہ و پنشن کن ڈیجیٹل نظام نا بے کچ اہم ڈٹ انا کمک اٹ گدرینگوک آ 20 سال آن پاکستان تون گنڈوک ءِ ۔ داوخت آ وزیراعظم پارے کہ حکومت پاکستان شاری تا غاو تا ازالہ ءِ کننگ کن سرکاری دفتر آتا ضابطہ ءِ گچین کننگ و کاروبار اٹی آسانی ودی کننگ تون اوار نظم و نسق اکن ڈیجیٹیل ایپلیکیشنز نا کاریم اٹ اتنگ ءِ تینا اولیت کرینے ۔ وزیراعظم سیپ ءِ حکومت نا ڈیجیٹل پاکستان گام گیج و خاص وڑاٹ ڈیجیٹیل چاہندارآتا شونداری و بھلا یونیورسٹی تا شریداری اٹ ورناتا تربیت اٹ کمک نا سلہ خلک ۔ وزیراعظم سیپ ءِ پاکستان اٹی سافٹ ویئر انجینئرنگ کن سافٹ ویئر لیبارٹری جوڑ کننگ نا ہم پیشکش کرے ۔ سیپ انا چیف ایگزیکٹو آفیسر نظم و نسق و اقتصادی بشخءِ ڈیجیٹل کننگ کن حکومت پاکستان نا گام گیج آتا ستاءِ کرے و او ورناسافٹ ویئر انجینئر آتے جرمنی ٹی تربیت فراوان کننگ و اوفتے پاکستان اٹی سافٹ ویئر نا شونداری کن کاریم اٹ اتنگ نا بابت سیپ انا عزم انا درشانی ءِ کرے ۔ سسٹم، ایپلیکیشنز ، پراڈکٹ(سیپ) کمپنی نا شمار دنیا نا بھلا سافٹ ویئر کمپنی تیٹی مریک ہرا پاکستان نا نجی و سرکاری بشخ اٹی انٹر پرائزریسورس پلاننگ سافٹ ویئر کن پنی ءِ ۔
