اسلام آباد۔ 20 فروری (اے پی پی) مسلم لیگ (ن) نا راہشون مائزہ حمید پارینے کہ وزیراعظم محمد نواز شریف دہشت گرد آتا برخلاف بے پرخ کارروائی کننگ کن پرعزم ئِ۔ ریڈیو پاکستان تون ہیت وگپ کرسا اوپارے کہ مسلم لیگ (ن) نا حکومت ہراتم برسراقتدار بس ہمووخت ملک توانائی تنکی و دہشت گردی اٹی اختہ ئس۔ وزیراعظم محمد نواز شریف اقتدار اٹی بننگ تون دا عزم انا درشانی ئِ کرے کہ دہشت گردی ئِ چٹفسا دم کشنہ و دا چرجوئی ٹی اوملک انا غٹ سیاسی جماعت آتون تین پہ تینی صلابت آن پد آپریشن ضرب عضب نا بنائِ کرے ہرانا سوب قطبی وزیرستان تون اوار ملک انا گیشتر علاقہ غاتیٹی امن نا اڈتننگ عمل اٹی بس۔ مائزہ حمید پارے کہ مسلم لیگ (ن) نا حکومت نا گچین پالیسی تا سوب پاکستان شونداری نا کسر آ پیش تمانے ، اسٹاک ایکسچینج نا انڈیکس اٹی عروج بس و لوڈشیڈنگ اٹی نمان کمتی واقع مس، اوپارے کہ پیشن نا زرکارآک پاکستان اٹی زرکاری کننگ ئُ و داکل پاکستان نا دشمن تے ہضم مفننگ ئُ ہرانا سوب او دہشت گرد کارروائی تے اٹ پاکستان ئِ نزور کننگ خوارہ۔ اوپارے کہ حکومت و پاکستان نا فوج دہشت گرد آتے اوفتا مسخت آتیٹی سرسہب مننگ کن الیپسہ۔ مسلم لیگ (ن) نا راہشون پارے کہ وزیراعظم دوٹوک لوز اٹی پارینے کہ دہشت گرد آتا برخلاف بے پرخ کارروائی عمل اٹی اتنگک۔ اوپارے کہ دہشت گردی نا چٹفنگ کن صوبہ غاتے بنجاتون اواری اٹ کارروائی کروئی مریک و ایلو صوبہ غاتا پولیس آتے ہم پنجاب پولیس آنبار دہشت گرد آتا برخلاف بے پرخ سلوک کروئی مریک۔
