اسلام آباد۔ 20 فروری (اے پی پی) قومی احتساب بیورو(نیب) نا چیئرمین قمر زمان چوہدری پارینے کہ نیب ملک آن بدعنوانی نا چٹفنگ کن زیروٹالرنس پالیسی آ عمل کرسا پیشہ واریت و شفافیت آ چکار تخانے۔ نیب اٹی اسیجائی جاست وپاستی نظام اس وضع کننگ آن مقدمہ غاتے میرٹ آ چٹفنگ اٹی کمک رسینگانے، نیب ئِ 2016 ءٹی 2015ءنا مقابلہ ٹی دوگناہ غاو ملانے ہراکہ الس نا نیب آ پت انا درشانی ئِ ، جہانی ادارہ غاک ہم بدعنوانی نا توننگ کن نیب نا کوشست آتا اعتراف ئِ کرینو۔ داخیال آتا درشانی ئِ او نیب ہیڈکوارٹر نا کارکڑد نا جاچ انا بابت دیوان نا کماشی ئِ کرسا کرے۔ اوپارے کہ نیب پاکستان ئِ بدعنوانی آن پاک کننگ کن پورو پیشہ واریت و شفافیت نا کمک اٹ میرٹ آ عمل کننگ ئِ ، نیب مچ آ ملک آن بدعنوانی نا چٹفنگ کن زیروٹالرنس پالیسی آ عمل کرسا بدعنوانی نا توننگ کن گچین جامع حکمت عملی اس وضع کرینے۔ اوپارے کہ مالی کمپنی تیٹی دھوکہ تننگ، بینک فراڈز، بینک نادہندگان، خلقت تون بھلو کچ اسے آ فراڈ و ملازم آتا سرکاری فنڈ اٹی گپلہ غاتا مقدمہ غاتے نیب اولیتی بنداو تیا چٹفک۔ اوپارے کہ گدرینگوک آ مسہ سال اٹی نیب افسر آتا کنڈآن چٹفوک آ غاو ک داہیت انا درشانی ئُ کہ نیب افسر آک بدعنوانی نا توننگ ئِ تینا قومی فرض سمجھسا اداکننگ ئُ۔ چیئرمین نیب پارے کہ نیب فرانزک سائنس لیبارٹری اس اڈ تسنے وخت اس کہ مقدمہ غاتے بروخت چٹفنگ کن 10 تو انا وخت مقرر کننگانے۔ نیب سینئر سپروائزری افسر آتا اجتماعی دانش آن فائدہ ہرفنگ کن اسیجائی جاست وپاستی ٹیم اسے نا نظام اس وضع کرینے، داڑآن نئے بیرہ نیب افسرآتا کارکڑد اٹی گچینی بسنے بلکن ہچ ئُ بندغ اس جاست و پاست آ اثر انداز مننگ کپک۔ چیئرمین نیب پارے کہ نیب سارک ملک آتے کن رول ماڈل نا حیثیت تخک۔ پاکستان سارک اینٹی کرپشن فورم نا چیئرمین ئِ، پاکستان بدعنوانی نا توننگ کن گچین کوشست آتا سوب دا ہند ئِ دوئی کرینے۔ نیب بدعنوانی نا توننگ کن چین اتون مفاہمت نا یات داشت آتیا دستخط کرینے ہراڑآن ہڑتوم آ ملک چین پاکستان اقتصادی راہداری نا بابت ڈٹ آتیٹی بدعنوانی نا توننگ نا چاروکی ئِ کننگ کیرہ۔ اوپارے کہ ورناتے بدعنوانی نا خراب انگا زئم تیان معلومدار کننگ کن نیب بڑزکو تعلیمی کمیشن اتون مفاہمت نا یات داشت آ دستخط کرینے۔ مچ آ ملک انا اسکول، کالج ویونیورسٹی تیٹی 42ہزار آن زیات کڑد سازی نا انجمن آتے اڈتننگانے۔ اوپارے کہ نیب تینا علاقائی بیورو تا کارکڑد نا جاچ ئِ ہلنگ کن جزوی مقداری نظام اس وضع کرینے ہراڑآن علاقائی بیوروتا جوانی و خرابی تے ہُننگ اٹی کمک رسینگانے۔ غٹ علاقائی بیورو تا سالانہ انسپکشن فروری 2017ءنا ایسر اسکان پورو مریک۔ اوپارے کہ بنجائی وصوبائی سرکاری ادارہ غاتیٹی شفافیت و میرٹ ئِ مون آ دننگ کن اوفتے ٹی قواعد وضوابط و ایلو خامی تا جاچ ئِ ہلسا گچینی کن وڑوڈول اس و سلاہ غاتے عملی جامہ بیرفنگ کن پریوینشن کمیٹی اڈتننگانے۔ دا کمیٹیک سی ڈی اے، وزارت مذہبی امور ، وزارت قومی رکھ خور، ہیلتھ سروسز ریگولیشن اینڈ کوآرڈینیشن، ایف بی آر، پی آئی ڈی آن بیدس صوبائی محکمہ ، جان جوڑی ، تعلیم ، ریونیو، ہاﺅسنگ ، کوآپریٹو نا محکمہ غاتیٹی اڈتننگانو۔ نیب پریوینشن کمیٹی تون اواری اٹ وزارت مذہبی امور ئِ 2016ءٹی حج بست و بند آتے گچین جوڑ کننگ کن سلاہ پیش کریسس ہراڑآ عملدرآمد آن حج بست و بند آتے گچین جوڑکننگ اٹی کمک ملا ہرانا ستائِ حاجیک ہم کریر۔ اونیب انا علاقائی بیوروتیا زورشاغا کہ او تعلقدار محکمہ غاتون صلابت کرسا اوفتے ٹی پریوینشن کمیٹی اڈ ایتر تانکہ اوفتا خامی و ریگولیٹری وڑوڈول ئِ گچین جوڑ کرسا میرٹ و شفافیت ئِ مون آ دننگ مرے۔
