نیویارک ۔ 10 جنوری (اے پی پی) اقوام متحدہ نا جنرل اسمبلی کنٹرول لین آ تعینات تینا مبصر مشن نا بجٹ نا منظوری ءِ تس ۔ 43فوجی و 73جہانی سویلین مبصر آتیان تالان دا مشن ءِ 1949ء آن اقوام متحدہ نا آخبتی بجٹ آن فنڈنگ کننگ انگ ءِ ۔ بھارتی حکومت مبصر مشن نا فنڈ ءِ کم کننگ کن چندی کوشست آتے کرے ولے جہانی فورم آ پاکستانی ڈل انا کنڈآن پبی مخالفت اٹی فنڈ آتا بابت اقوام متحدہ نا کمیٹی مبصر مشن نا مالی وسیلہ غاتے برقرار تخنگ نا فیصلہ ءِ کرے ۔ داکان بیدس بھارت ءِ مبصر مشن نا سرینگر نشست ءِ چٹفنگ اٹی ہم بے سہبی تون مون تروئی تما ۔ ذراءع نا پاننگ ءِ کہ بھارتی اعتراض آتارداٹ پاکستانی ڈل مبصر مشن نا اہمیت ءِ پک کننگ اٹ پبی وڑاٹ سرسہب مس ہرانا شون ہلوک آ ملک آک و چین ہم پبی مخ تفی ءِ کرے ۔ یات سلے کہ بھارت مدام مبصر مشن ءِ چٹفنگ آ زور شاغسا بسنے وخت اس کہ پاکستان نا موقف ءِ کہ مبصر مشن نا ساڑی گری علاقائی امن و سوگوی کن المی ءِ ۔ داکان بیدس جہانی مبصر آتا ساڑی گری نا سوب وقتا فوقتادنیا نا مون آ تنازعہ کشمیر تالان مرسا کیک ۔
