سرینگر ۔ 27 دسمبر (اے پی پی) مقبوضہ کشمیر اٹی 5 اگست آن پدریسہ برجاءُ فوجی گھیڑ انا سوب آن مصیبت آتا گواچی کشمیری تا مشکل آک ترند یخ موسم اٹی پین ودانو ۔ کشمیر میڈیا سروس نا رداٹ وادی کشمیر اٹی فوجی گھیڑ پدریسہ 145 می دے آ ہم برجاءِ ۔ وادی و جموں ریجن و لداخ نا مسلم گیشتری علاقہ غاتے ٹی خوف و خلیس نا چاگڑد پدریسہ برجاءِ ۔ دفعہ 144 نا رداٹ سخت پابندی خلوک ءِ و کونہ کونہ غا بھلو کچ اسے ٹی بھارتی فوجی و پولیس کارندہ غاک تعینات ءُ ۔ مقبوضہ علاقہ ٹی انٹرنیٹ ، پری پیڈ موبائل فون و ایس ایم ایس سروس ہم کم و ود تدوک آ 5 تُو آن پدریسہ بند ءُ ۔ بے پک حالیت آتے ٹی دوکانک بیرہ سہب انا وخت آ منہ گھنٹہ کن ملنگرہ تانکہ خلقت گرج انا گڑاتے ہلنگ کیر ۔ دفتر آتے ٹی حاضری کم ءِ وخت اس کہ روڈ آتیا پبلک ٹرانسپورٹ ہم کم نظر بننگ ءِ ۔ ترند یخ انا موسم آن وادی کشمیر نا گھیڑ الس نا مشکل آک پین ودانوہرافتے مہالو آن پدریسہ فوجی گھیڑ انا سوب آن خور و زند ءِ بچفوک آ دوائی تے تون اوار گرج انا گڑاتا بھاز کاختی نا مون تروک ءِ ۔ مچ آ وادی کشمیر و لداخ نا کم آن کم درجہ حرارت نقطہ انجماد آن کیہی درجہ تمنگ آن چندی ہند آتیا دیر نل تیٹی تفینو ۔ مقبوضہ علاقہ یخ انا سخت انگا 40 دے ئی دورانیہ ’’چلہ کلان‘‘ آن گدرینگ انگ ءِ ہرا 21 دسمبر آ بناکریسس ۔
