وزیر خارجہ شاہ محمود قریشی نا دیوان آن تران

اسلام آباد ۔ 27 دسمبر (اے پی پی) وزیر خارجہ شاہ محمود قریشی پارینے کہ ننا سلہہ بند فوج و پاکستانی قوم انا چناچنا دا وطن نا رکھ اکن پرعزم ءُ، پاکستان مقبوضہ جموں و کشمیر اٹی جاری بھارتی بیدادی ءِ ہر پلیٹ فارم آ بے نقاب کننگ ءِ ۔ داہیت آتے او جمعہ نادے آ وزارت خارجہ ٹی مسکوہی خارجہ سیکریٹریز نا سلابتی دیوان نا کماشی ءِ کرسا پارے ۔ دیوان اٹی مقبوضہ جموں کشمیر اٹی برجا بھارتی جارحیت و ڈیہہ ٹی امن و ایمنی نا حالیت آتیا گپ و تران کننگا ۔ وزیر خارجہ پارے کہ اینو مقبوضہ جموں و کشمیر اٹی کرفیو ءِ نافذ کننگ ءِ 144 دے تدینگانے ۔ بھارت ذراءع مواصلات آ پابندی خلسا دنیا ءِ مقبوضہ جموں و کشمیر نا اصل راستکی تسکان رسینگ آن محروم تخا ۔ اوپارے کہ اینو مودی سرکار نا مسلم کش ، و ہندو تواسوچ مچ آ ہندوستا ن ءِ بشخانے ۔ سیکولر ہندوستان نا مخ تف گلی گلی، نگر نگر ترمیمی شہریت نا پرخی کانود و این آر سی نا برخلاف سراپا برانز کننگ ءُ ۔ شاہ محمود قریشی پارے کہ 5 اگست آ ہرا خاخر ءِ مودی حکومت مقبوضہ جموں و کشمیر اٹی لگفیسس او داسہ مچ آ ہندوستان اٹ تالان مسنے ۔ ہندوستان، تینا تہہ نا انتشار آن چکار ءِ اسہ کنڈ کننگ کن پدریسہ لین آف کنٹرول نا خلاف ورزی ءِ کننگ ءِ ۔ شاہ محمود قریشی پارے کہ ننا سلہہ بند فوج و پاکستانی قوم انا چناچنا دا وطن نا رکھ اکن پرعزم ءُ ۔ پاکستان ، مقبوضہ جموں و کشمیر اٹی برجا بھارتی بیداد ی ءِ ہرپلیٹ فارم آ بے نقاب کننگ ءِ ۔ وزیر خارجہ مسکوہی خارجہ سیکرٹریز آتے مقبوضہ جموں و کشمیر نا حالیت آتا بابت صدر سیکورٹی کونسل نا نوشتہ کروک آ تینا ساڑی آ چھٹی نا مندرجہ غاتیان معلومدار کرے ۔ دیوان اٹی اہم خارجہ پالیسی باندات آتیا ، دا سلابتی چرجوئی ءِ تواتر اتون برجاتخنگ آ امنا کننگا ۔