کوءٹہ ۔ 26 دسمبر (اے پی پی) وزیراعلیٰ بلوچستان جام کمال خان پارینے کہ تعمیرات تون اوار غٹ بشخ آتے ٹی انقلابی بدلی رونما مننگ ءِ، ننے ہم عمومیت آن پیش تمسا چاہنداری نا کنڈا ہنوئی مریک، تعمیراتی محکمہ کانود، قاعدہ و ضابطہ و وڑوڈول نا گچین آ کاریم کے، شونداری عمل اٹی دوررس ڈٹ بندی ءِ بنداو جوڑ کننگے، ٹینڈرنگ نا عمل اٹی کنٹریکٹر فرم آتا کاریم نا کچ و تکنیکی چاہنداری ءِ ہم ہُننگے تانکہ ڈٹ آتا آب اٹ پوروی ممکن مننگ کے ۔ داخیال آتا درشانی ءِ او پی ایس ڈی پی ٹی اوار شونداری ڈٹ آتا پیش رفت نا ہفتہ وار جاچ دیوان اٹی کرے، صوبائی وزیر محمد خان طور اتمانخیل، میر ظہور احمد بلیدی، عبدالخالق ہزارہ ، محمد خان لہڑی، پارلیمانی سیکرٹری ماہ جبین شیران، ایڈیشنل چیف سیکرٹری ڈٹ بندی و شونداری و تعلقدار محکمہ غاتا سیکرٹری و کمامدارآک ہم دیوان اٹی ساڑی ئسر ۔ دیوان ءِ پی ایس ڈی پی ٹی اوار چندی سیکٹر آتا 77 اولیتی ڈٹ آتا پیش رفت نا بابت حوال ترسا پاننگاکہ اولیتی ڈٹ آتیان بیدس ایلو پوسکن آ ڈٹ آتیا بنائی کارروائی ترندی اٹ برجاءِ و داوخت اسکان 1135 ڈٹ آتا ٹینڈر مسنے، دیوان ءِ پاک اوغان و پاک ایران سیم آ واپاری ہند آتا سلاہ ئی ڈٹ آتا پیش رفت آن معلومدار کننگا، وزیراعلیٰ دا ڈٹ آتے کن کنسلٹنٹ نا خذمت آتا دوئی کننگ نا پارت کرسا پارے کہ سیمی علاقہ غاتے ٹی معاشی سرجزآتا مون آ دننگ نا بابت دا اسہ انقلابی ءُ ڈٹ اس مریک ۔ وزیراعلیٰ واپارہند آتا اڈتننگ آن بیدس ایلو اہم ڈٹ آتے کن ڈغار تا فراوانی نا عمل ءِ ترند کننگ ناپارت کرے، دیوان ءِ پوسکن آ پرائمری اسکول آتا جوڑ کننگ، تربت اٹی نرسنگ ٹریننگ کالج نا اڈتننگ، روشن بلوچستان پروگرام، لسبیلہ و گوادر اٹی وڈبوٹ صنعت نا اڈتننگ، ضلع غاتے ٹی پبلک پرائیویٹ پارٹنر شپ انا رداٹ پوسکن آ ماڈل ٹاءون تا اڈتننگ و تینا اُرا ہاءوسنگ اسکیم، ضلع غاتا ماسٹر پلاننگ، سپورٹس کمپلیکس آتا اڈننگ ، ڈویژنل ہیڈ کوارٹر آتے ٹی وومن ہاسٹل آتا اڈتننگ و کوءٹہ ڈویلپمنٹ پیکج نا بابت حوال تننگا، وزیراعلیٰ روشن بلوچستان پروگرام نا رداٹ آواران ءِ ماڈل ٹاءون نا وڑاٹ شمسی توانائی نا ذریعہ بجلی نا فراوانی نا ڈٹ انا بناءِ کننگ ناپارت کرے ۔ اوسپورٹس کمپلیکس نا جوڑ کننگ نا ڈٹ اٹی بھلا نجی ادارہ غاتا کمک و شریداری نا دوئی کننگ نا پارت ہم کرے وخت اس کہ او بلوچستان یوتھ سپورٹ پروگرام ءِ پین جامع و گچین کننگ آ زور شاغا ، وزیراعلیٰ ساڑی آ دور انا گرج آتون ہم گرنچ مننگ کن محکمہ غاتا وسعت و چاہنداری آ مبنی آسامی تا ٹہیفنگ ءِ المی گوندا ۔ وزیراعلیٰ پارے کہ تدوک آ پانزدہ سال اٹی ودی مروک آ خرابی تا بھلا سوب گچین نظام نا دوئی مفننگ ئس ۔ داہیت انا رداٹ حکومت گورننس و نظام نا گچینی ءِ اولیت تننگ ءِ، وزیراعلیٰ جاری تعمیراتی ڈٹ آتا پورو آڈٹ ءِ کننگ نا پارت ہم کرے ۔
