صوبائی وزیر داخلہ و قبائلی امور میر ضیاء لانگو نا چائلڈ پروٹیکشن نا دود آن تران

کوءٹہ ۔ 26 دسمبر (اے پی پی) صوبائی وزیر داخلہ و قبائلی امور میر ضیاء اللہ لانگو پارینے کہ چناتا برخلاف جنسی زیزاریفنگ ناقابل معافی ڈوہ اسے ، سوشل میڈیا و انٹرنیٹ نا منفی کاریم اٹ اتنگ ءِ تورسا دا ناخوشگوار واقعہ غاتے ٹی کمتی اتنگ مریک ۔ صوبائی حکومت چناتا رکھ اکن بنجائی محتسب و کمشنر اطفال نا ادارہ غاتون ہروڑ نا کمک کیک ۔ دا ہیت ءِ او پنچ شنبے نادے آ چائلڈ پروٹیکشن نا بابت چیمبر آف کامرس اٹی بنجائی محتسب سیکرٹریٹ نا کنڈآن اڈ ہلوک آ دود آن تران کرسا کرے ۔ داوخت آ فوکل پرسن بنجائی محتسب و کمشنر اطفال سیدہ وقارالنساء ہاشمی، پارلیمنٹ نا باسک،غیر سرکاری تنظیم تا نمائندہ غاک بھلو کچ اسے ٹی ساڑی ئسر ۔ صوبائی وزیر داخلہ و قبائلی امور میر ضیاء اللہ لانگو پارے کہ بلوچستان حکومت چائلڈ پروٹیکشن نا بابت تینا فرض آن غافل اف بلکن دا رداٹ غٹ اسٹیک ہولڈرز آک ہروڑنا کمک کن تیار ءُ چناتا رکھ و دا جنسی زیزاریفنگ نا واقعہ غاتیان بچنگ کن پوسکن ءُ کانود سازی اسے تون اوار مست آن ساڑی کانود آ سختی اٹ عملدرآمد ءِ پک کننگ کن راج انا غٹ تپہ غاک انتظامیہ تون کمک کیر ۔ چناک قوم انا آخبت ءُ، اوفتا رکھ و حق آ ہچ ءُ سمجھوتہ اس کننگپک، جنسی درندگی نا مرتکب عنصر آتے اوفتا کروک نا سزا تننگک ۔ اوپارے کہ غٹ شاریک تینا فرض ءِ پورو کرسا ڈوہ انا توننگ اٹ پولیس و انتظامیہ تون کمک کرسا تینا بشخ انا کاریم ءِ کیر انتئے کہ بیرہ حکومت و ادارہ غاتیا تنقید کننگ ویل انا ایسری اف ۔ میر ضیاء اللہ لانگو پارے بلوچستان یونیورسٹی ٹی مبینہ جنسی زیزاریفنگ سکینڈل نا معاملہ ءِ ہراوڑمنفی وڑاٹ تالان کننگا اونا غلط زہم آتیان یونیورسٹی ، استاد و طالب علم آتا بدنامی مس و زموار آتا تعین ءِ کننگ اٹ حکومت ءِ دشواری تون مون تروئی تما، ہنداخاطران راج انا غٹ تپہ غاتا زمواری مریک کہ او کودک چناتا رکھ اکن تعلیمی ادارہ غاتے ٹی آگاہی مہم اس چلیفنگ تون اوار لمہ و باوہ و اسٹیک ہولڈر آتے پٹ اٹ ہلیر ۔