سعودی عرب ءِ فرمانروا شاہ سلمان بن عبدالعزیز ءِ سپیکر قومی اسمبلی اسد قیصر ءِ سروکی ءَ پارلیمانی ڈل ءَ گوں گند ءُُ نند ءِ ساھت ءَ تران

ریاض۔ 24 دسمبر (اے پی پی) سعودی عرب ءِ فرمانروا شاہ سلمان بن عبدالعزیز ءَ گوشت کہ مسلمان آنی استیں جیڈھ آنی گیواری ءِ واستہ مسلمان آنی وت مہ وت یکوئی المی انت، پڑ ءَ ایمنی ءُُ مسلم ملک آنی تہ ءَ یکوئی ءِ واستہ پاکستان ءِ کرد لائک ءِ ستا انت، مسئلہ کشمیر ءَ ھوار توامیں جیڈھ آنی گیواری سول ءُُ تران ءِ وسیلگ ءَ ایمنیں رنگ ءَ گیواری کنگ بہ بیت، سعودی عرب کشمیر ءِ جیڈھ ءَ را یونائیٹڈ نیشن ءِ منوگری آنی رد ءَ ایمنی ءَ گوں گیواری لوٹ ایت، پاکستان ءِ جوڑیشت ءُُ دیمروئی ءِ واستہ سعودی عرب ھمک رنگیں کمک جاڑی دار ایت۔ اے ھیالانی درشانی آئی ءَ سئے شمبے ءَ شاہی محل ءَ سپیکر قومی اسمبلی اسد قیصر ءِ سروکی ءَ پارلیمانی ڈل ءَ گوں گند ءُُ نند ءِ ساھت ءَ تران کنان ءَ کت۔ گند ءُُ نند ءَ دو نیمگی یکوئی، مسلمان آنی جیڈھ ءُُ وت مہ وتی کار آئی ھوالگ ءَ ھیال ریچی کنگ بوت۔ پاکستان ڈل ءِ تہ ءَ سپیکر قومی اسمبلی اسد قیصر ءَ ھوار حکومت ءُُ اپوزیشن گل آں گوں سیادی داروکیں باسک ھوار اتنت۔ گند ءُُ نند ءَ اے گپ ءِ سر ءَ تپاک کنگ بوت کہ مسلمان آنی جیڈھ آنی گیواری ءِ واستہ یکجائی گامگیج کنگ لوٹ ایت۔ سپیکر قومی اسمبلی اسد قیصر ءَ سعودی فرمانروا شاہ سلمان بن عبدالعزیز ءَ را کشمیر ءِ جاور ھال آنی بابت ءَ سرپد کنان ءَ گوشت کہ مقبوضہ کشمیر ءَ 141روچ ءَ چہ کرفیو جاڑی انت ایشی ءِ سبب ءَ لس زندمان سک آماچ انت ءُُ ایشی ءِ سبب ءَ مقبوضہ کشمیر ءَ وردن ءُُ وراک ءِ سک باز کمی انت۔ شاہ سلمان بن عبدالعزیز ءَ گوشت کہ کشمیر ءِ جیڈھ ءِ ھوار توامیں کشاں چیل آناں سول ءُُ تران ءِ وسیلگ ءَ ایمنیں رنگ ءَ گیوار کنگ لوٹ انت، سعودی عرب کشمیر ءِ جیڈھ ءَ را یونائیٹڈ نیشن ءِ منوگری آنی رد ءَ ایمنیں رنگ ءَ گیواری لوٹ ایت۔ آئی ءَ گوشت کہ پاکستان اسلامی دگنیا ءَ یک ارزشتی ایں ملک ات، ایشی ءِ جوڑیشت ءُُ دیمروئی ءِ واستہ سعودی عرب ھمک رنگ ءِ کمک ءَ جاڑی دار ایت۔