اسلام آباد۔ 24 دسمبر (اے پی پی) صدر مملکت ڈاکٹر عارف علوی پارینے کہ راج انا نیزگار و نزور تپہ غاتا کمکءِ کننگ اسلامی راج انا المی ءُ جزو اسے، پاکستان لکھ آ باہوٹ آتے جاگہ تس و کم و ود چار دہائی آن ملوک آ است اٹ اوفتا میزبانی ءِ کرسا انسانی ہمدردی نا مثال اس قائم کرے۔ خصوصی بندغ آتے کن آسراتی و وارخواہی تا فراوانی نا بابت کانود آ عملدرآمد و رویہ غاتے ٹی گچینی اتنگ نا گرج ءِ۔ او سے شنبے نادے آ ایوان صدر اٹی اخوت فاؤنڈیشن نا کنڈآن دود آن تران کریکہ۔ صدر مملکت پارے کہ انسان تا تین پہ تین تعلق نا آب مہر و مریبت و انسانیت آ بایدے مرے، پاکستان دا اعتبار اٹ اہم ءُ ملک اسے ہرا دہشت گردی نا برخلاف جنگ آن پد داسہ انسانی ہمدردی نا جوزہ نا لحاظ اٹ دنیا ٹی مون آ بننگ ءِ۔ اوپارے کہ پاکستان 35لکھ باہوٹ آتے ملوک آ است اٹ جاگہ تس و کم و ود چار دہائی آن اوغان باہوٹ آتا میزبانیءِ کننگ ءِ ولے ملک انا تہہ آن وخت اس ہم دابارواٹی ہچ ءُ اعتراض اس ہرفنگتو وخت اس کہ باہوٹ آتے کن یورپ نا ردعمل ہم غٹ انا مون آٹے۔ صدر مملکت پارے کہ پاکستان اٹی مخیر خواجہ غاتا زیات کچ ستاکڑزک۔ پاکستان نا الس ناگمانی آفت آتے ٹی حکومت آتا انتظار ءِ کننگ آن بیدس زہمی تا کمک اٹ زیات آن زیات بشخ ہلیک، ننا مذہب، راج انا نیزگار و نزور تپہ غاتا کمک ءِ کننگ نا تعلیم ایتک۔ ننا خواجہ ﷺ خیرات کننگ نا عملی درس تس۔ اوپارے کہ نن جوانی و نیکی ءِ بایدے مون آ دین تانکہ ایلوفتے ہم دانا ترغیب ملنگ کے۔ صدر مملکت خصوصی بندغ آتے کن ہردے ئی زند انا آسراتی تتون اوار اوار اوفتے تعلیم، روزگار و شونداری نا وارخواہی ہم بایدے دوبرے۔
