اسلام آباد۔ 24 دسمبر (اے پی پی) وزیراعظم نا خصوصی کمکار حوالکاری وشین کاری ڈاکٹر فردوس عاشق اعوان پارینے کہ مشترکہ مفادات کونسل نا دیوان وزیراعظم عمران خان نا بنجا نا غٹ اکائی تے اوار دننگ و ملکی شونداری نا بھرم تے ملک انا کنڈ کنڈ اسکان سرکننگ نا عزم انا عملی ءُ شاہدی اسے، عمران خان پاکستان نا وزیراعظم ءِ او غٹ صوبہ غاتا الس نا حق آتا رکھ ءِ پک کیک۔ داخیال آتا درشانی ءِ او سے شنبے نادے آ تینا ٹویٹ اٹی کرے۔ ڈاکٹر فردوس عاشق اعوان پارے کہ مشترکہ مفادات کونسل نا دیوان اٹی سال آتیان تاخیر نا گواچی باندات آتیا مفاہمت تون سیر اٹ گپ و تران و امنائی ودی کننگ نا کنڈا اہم ءُ پیش رفت اس مس، اونا پاننگ ئس کہ وزیراعظم نا کماشی ٹی دیوان اٹی غٹ وزیراعلیٰ تا بشخ ہلنگ داہیت انا شاہدی ءِ کہ ملکی سرکڑدہ ہی قومی اہمیت نا باندات آتون اوار السی راجی آسراتی و ملکی شونداری کن یکجا ءُ۔ خصوصی کمکار پارے کہ وزیراعظم دیوان اٹی گیس رائلٹی خاص کر صوبہ غاتے ٹی دیر انا ساف بشخنگ نا پارت تس، ٹیلی میٹری نظام دیر انا ساف بشخنگ اٹ کمکار مریک، اسہ وڑ تعلیم و پٹ وپولی آب انا مسخت آتا دوئی کننگ کن سرجم آتے تین پہ تینی سلابت اٹ طے کننگ آ امنا ئی ہم ستاکڑزک۔ اوپارے کہ دیوان اٹی حویلی بہادر شاہ و بلوکی پاور پلانٹ نا نجکاری نا بابت آگاہ و واپڈ انا چیف ایگزیکٹو کن قابل شخصیت نا گچین کاری نا فیصلہ ءِ ہم کننگا۔
