اسلام آباد۔ 24 دسمبر (اے پی پی) وزیراعظم نا خصوصی کمکار جان جوڑی ڈاکٹر ظفر مرزا پارینے کہ ودوک آ آبادی نا رداٹ فیڈرل ٹاسک فورس انا اولیکو دیوان بھلو تاریخی ءُ گام و پیش رفت اسے، ودوک آ آبادی قومی سلامتی نا ویل اسے و دانا مون ءِ توننگ المی مسنے، پاپولیشن فنڈ انا اڈتننگ ہم ایجنڈاٹی اوار ءِ۔ داخیال آتا درشانی ءِ او سے شنبے نادے آ فیڈرل ٹاسک فورس انا اولیکو دیوان آن پد تینا اسہ بیان اسے ٹی کرے۔ اوپارے کہ ٹاسک فورس انا دیوان صدر مملکت ڈاکٹر عارف علوی نا کماشی ٹی اڈ ہلک، ودوک آ آبادی نا رداٹ فیڈرل ٹاسک فورس انا اولیکو دیوان بھلو تاریخی ءُ گام و پیش رفت اسے۔ اوپارے کہ ودوک آ آبادی قومی سلامتی نا ویل اسے و دانا مون ءِ توننگ داسہ المی مسنے۔ دیوان نا ایجنڈا سی سی آئی نا فیصلہ غاتا پارت آ تیار کروک آ قومی بیانیہ و لائحہ عمل نا منظورءِ تننگ نا ءِ۔ اوپارے کہ فنڈ اٹی صوبہ غاتے کن مانع حمل گڑاتا ہلنگ کن 50 درسد ودکی فنڈ جتا کننگانے۔ ڈاکٹر ظفر مرزا پارے کہ پاکستان دنیا نا پنچ میکوبھلا گنجان آباد ملک ءِ ہرانا آبادی 207.8 ملین ءِ و 1998ء آن ہلیس 2017ء نا نیام اٹ آبادی ٹی ودکی نا سالانہ کچ 2.4 درسد مسنے ہرا ایلو مک آتا مقابلہ ٹی زیات ءِ۔ اوپارے کہ اگہ آبادی نا کچ ہنداوڑ ودسا ہنا تو پاکستان نا آبادی بروک آ 30 سال آتے ٹی اِراہنداخہ مریک۔ خصوصی کمکار پارے کہ مشترکہ مفادات کونسل تینا اولیکو دیوان اٹی وزارت جان جوڑی ءِ عمل نا قابل سلاہ و سوج آتے کن لائحہ عمل اس جوڑ کننگ نا پارت کریسس و وزارت جان جوڑی او پارت آتے مون آ تخسا ٹائم لائن بجٹ و ایلو شریدار آتا سلابت اٹ لائحہ عمل اس مرتب کرینے۔ اوپارے کہ دیوان اٹی ہر چار آ صوبہ غاتا وزیراعلیٰ و فیڈرل ٹاسک فورس انا ریگولر باسک آک بشخ ہلکونو و فیڈرل ٹاسک فورس انا بروک آ اہم دیوان اسہ تُو آن پد جنوری نا ایسر اٹی اڈ ہلیک۔
