اسلام آباد۔ 24دسمبر (اے پی پی) جہانی مالیاتی فنڈ (آئی ایم ایف) پاکستان تون ایکسٹینڈ ڈ فنڈ فسیلٹی ایگریمنٹ نا رداٹ کروک آ معاہدہ نا اولیکو جاچ دیوان آن پد پارینے کہ پاکستان مالیاتی نظم و ضبط اٹی گچینی و معاشی سوگوی کن خاطر خواہ گام گیج کرینے، مالیاتی نسخان ءِ کم کننگانے ہراڑان اقتصادی شرح نمو نا ودنگ نا ہدف آتا دوئی کننگ اٹ کمک رسینگک، خراج محصولات آتا مون آ دننگ کن گام گیج آتے برجاتخنگ نا گرجءِ، ہنداوڑ خڑچ آتے کم کننگ نا پالیسی ستاکڑزک۔ آئی ایم ایف نا اولیکو جاچ دیوان آن پد آئی ایم ایف نا مشن چیف پاکستان، دے ٹکی نیامی و نیامی ایشیاء ارنیسٹو ریمیرز ریگو ڈائریکٹر کمیونیکیشن نا خصوصی کمکار اولگا سٹینکوف تون اوار جاچ رپورٹ ءِ جاری کرے۔ داوخت آ اوفک پاریر کہ آئی ایم ایف نا ایگزیکٹو بورڈ تدوک آ ہفتہ تینا دیوان اٹی پاکستان نا معاشی کارکڑدگی نا سرجم جاچ ءِ ہلکر و داڑا است جمی نا درشانی ءِ کرسا پاکستان ءِ ارٹ میکو قسط ءِ جاری کننگ نا فیصلہ کریر۔ اوفک پاریر کہ اولیکو جاچ دیوان اٹی پاننگاکہ پاکستان پروگرام آ عملدرآمد ءِ پک کرینے و مالی سال انا اولیکو سہ ماہی ٹی تخوک آ ہدف آتے دوئی کرینے یا اوفتا دوئی کننگ نا خڑک مسنے۔ پاکستان مالی سال انا اولیکو مسہ تُو اٹی مالیاتی نسخان ءِ کم کننگ کن خاطر خواہ گام گیج کرینے۔ رپورٹ اٹی پاننگانے کہ پروگرام نا بناآ پاکستان اٹی مالیات نا بشخ انا کارکڑدگی ءِ گچین کننگ آ امنا کننگا و پاکستان نا تعلقدار کمامدارآتے بروک آ سہ ماہی ٹی ہم دا بابت تیار کروک آ پالیسی تے برجاتخنگ نا گرج ءِ۔ اوفک پاریر کہ پاکستان نا تعلقدار کمامدار آک مالیاتی پالیسی تا چرجوئی کن پرعزم ءُ، و او پروگرام نا غٹ تر مسخت آتا دوئی کننگ کن کاریم کننگ ءُ ہراڑکن ڈھانچہ جاتی اصلاحات آ ہم کاریم کننگ انگ ءِ۔ آئی ایم ایف نا مشن چیف پاکستان، دے ٹکی نیامی و نیامی ایشیا ارنیسٹو ریمیرز ریگو پارے کہ پروگرام نا ارٹ میکو مرحلہ ٹی اصلاحات نا پروگرام آ عملدرآمد کننگک انتئے کہ ملک اسے نا ادارہ جاتی فریم ورک ءِ گچین کننگ کن اصلاحات بنداوی اہمیت تخک۔ اوپارے کہ پاکستان نا زرگزران نا بابت مسہ گڑا بنداوی اہمیت تخرہ ہرافتے ٹی غٹ آن اولیکو گڑا مالیاتی کارکڑدگی نا آب ءِ گچین کننگ ناءِ۔ اوپارے کہ پاکستان اولیکو سہ ماہی ٹی مالیات نا بشخ انا کارکڑدگی ٹی گچینی و مالیاتی نسخان نا مون ءِ توننگ کن گچین کارکڑد نا درشانی ءِ کرینے و دا عمل ءِ برجاتخنگ نا گرج ءِ و داڑتون اوار اوار وصولی تیٹی ودکی ہم المیءِ تانکہ حکومتی کٹیا ءِ ودفنگے۔ داکان بیدس غیر ضروری خڑچ آتا مون ءِ توننگ نا بابت پاکستان نا معاشی ٹیم انا کارکڑدگی ہم ستاکڑزک۔ اوپارے کہ پروگرام نا بنداوی مسخت خراج محصولات آتے ٹی ودکی ءِ نئے کہ خڑچ آتے ٹی کمتی۔ اوپارے کہ دا حکمت عملی نا گرج داخاطران پیش بس انتئے کہ ننا اندازہ ءِ کہ پاکستان داوخت اسکان شونداری عمل اٹ پدی ءِ و بنداوی پنجر نا بشخ انا شونداری کن ہم پین خڑچ آتا گرج ءِ ہنداخاطران آئی ایم ایف فیصلہ کرینے کہ مالیاتی بشخ انا کارکڑدگی و حکومت کٹیا نا مون آ دننگ آن شونداری خڑچ آتا گرج آتے پورو کننگ نا گرج ءِ۔ اوپارے کہ پروگرام اٹ مالیات نا بشخ انا کارکڑدگی ءِ آب اٹ کننگ آ زیات آن زیات چکار کننگ انگ ءِ ہراٹی خراج پالیسی اصلاحات ہم اوار ءِ و بروک آ سال انا بجٹ اٹی خراج پالیسی اصلاحات آتے درستی راستی کرفنگک۔ اومستی پارے کہ مالیات نا بشخ اٹی کارکڑدگی ءِ پین گچین کننگ کن توانائی نا بشخ انا گردشی وام تے ہم کم کننگ نا گرج ءِ دا بابت آئی ایم ایف و پاکستان نا کمامدارآک اواری اٹ اسہ جامع حکمت عملی اس جوڑ کرینو ہراڑا عملدرآمد نا بناءِ کننگانے و دانا بھرم تیا بروک آ جاچ دیوان اٹی سرجم سجفنگک۔ ہنداوڑ اوپارے کہ نیپرا نا بابت کانود سازی نا ہم گرج ءِ ہرا توانائی نا بشخ انا ریگولیٹر ءِ تانکہ پالیسی آ عملدرآمد نا کمک اٹ گردشی وام تے کم کننگ مرے۔ اوپارے کہ نیپرا نا قاعد و ضابطہ کن کاریم کننگ انگءِ و مرکزی بینک مالیات نا بشخ اٹی ڈھانچہ جاتی اصلاحات نا بابت کانودسازی ءِ حتمی دروشم اس تسنے۔ ہرانا بروک آ دیوان اٹی جاچ ءِ ہلنگک۔ اوپارے کہ جہانی مالیاتی فنڈ پاکستان کن منظور کروک آ پروگرام آ عملدرآمد نا جاچ ءِ ہلنگ کن مالی سال نا اولیکو سہ ماہی نا کارکڑدگی آ سرجم سجفسا اودے است جم گوندانے ولے مالیات نا بشخ اٹی پین گچینی کن ادارہ جاتی و ڈھانچہ جاتی اصلاحات نا گرج ءِ۔