اقوام متحدہ۔ 24دسمبر (اے پی پی) اقوام متحدہ تینا رپورٹ اٹی پارینے کہ مقبوضہ علاقہ غاتے ٹی 20 لکھ آن زیات فلسطینی انسانی ہمدردی نا تنکی تون مون تننگ ءُ، و غٹ آن زیات گڑتی تون مون تروک بندغ آتا زند ءِ بچفنگ کن 348 ملین ڈالر آتا ہلہلئی وڑاٹ گرج ءِ۔ اقوام متحدہ ساڑی ٹی مقبوضہ علاقہ غاتا 24لکھ آن 15لکھ فلسطینی تیکن انسانی ہمدردی نا امداد 2020 نا اسہ ڈٹ اس بناکرینے۔ اقوام متحدہ نا پاننگ ءِ کہ غزہ نا گیشتر ہنکینی ہندن ءُ، ہرافتا حالت بھاز خراب ءِ۔ مقبوضہ فلسطینی علاقہ کن انسانی ہمدردی نا رابطہ نا رجیمی میک گولڈرک پارینے کہ غزہ نا کم و ود نیمہ آبادی بے روزگار ءِ۔ دا کچ اٹی 30 سال آن کم وئی نا ہر 10 آن 7ورنا ہندن ءُ ہرافتے تون ہچ ءُ روزگار اس اف۔ اوپارے کہ دافتے ٹی چار لکھ آن زیات یونیورسٹی گریجویٹس ءُ ہرا ہچ ءُ ملازمت اس پٹنگ کپسہ۔ حالیت آک اوفتیان اوفتا تغ ءِ ہم پلانو۔ مک گولڈرک پارے کہ غزہ ٹی گیشتر خلقت تون کُننگ کن جوا ن ءُ خور ہم اف۔ ہموجاگہ نا غٹ اُراتیان 60 درسد ءِ خور انا کمتی نا مون تروک ءِ۔ غزہ ٹی جان جوڑی نا نظام بھس کاری نا رہی آٹے۔ ڈاکٹر آتا اسہ بھلو کچ اس پیشن نا ملک آ ہنانو۔ دوائی، طبی گڑا و ازباب آتا ترسیل کم مسنے۔
