حکومت نا پبی کوشست ءِ کہ سوگوی نا بروک آ مرحلہ معاشی شونداری نا دروشم اس اختیار کے
وزیراعظم عمران خان نا پی ایس ڈی پی نا بارواٹی جاچ دیوان آن تران
اسلام آباد۔ 23 دسمبر (اے پی پی) وزیراعظم عمران خان پارینے کہ مشکل معاشی حالیت آتیان پد ہم معاشی سوگوی نا دوئی کننگ آن پد حکومت نا پبی کوشست ءِ کہ سوگوی نا بروک آ مرحلہ معاشی شونداری نا دروشم اس اختیار کے، ننا وژن ملک ءِ پائیدار معاشی شونداری نا کسر آ دننگ نا ءِ، ہراڑکن مریس وختی جامع ڈٹ بندی بے کچ اہمیت تخک۔ داہیت ءِ او دوشنبے نادے آ سرکاری بشخ انا شونداری پروگرام مالی سال 2019-20 ء آ پیش رفت نا جاچ دیوان نا کماشی ءِ کرسا پارے۔ دیوان اٹی وزیر ڈٹ بندی اسد عمر، وزیر تعلیم شفقت محمود، وزیر نیشنل فوڈ سیکورٹی خسرو بختیار، خصوصی کمکار حوالکاری و شین کاری ڈاکٹر فردوس عاشق اعوان، ڈپٹی چیئرمین پلاننگ کمیشن، سیکرٹری پلاننگ و ایلو سینئر آفیسر آک ساڑی ئسر۔ وزیراعظم ءِ پبلک سیکٹر ڈویلپمنٹ پروگرام مالی سال 2019-20 ء نا اولیکو و ارٹ میکو سہ ماہی نا پیش رفت آ جم حوال تننگا۔ شونداری ڈٹ آتا بابت چندی وزارت آتا داوخت اسکان نا کارکڑدگی نا سرجم رپورٹءِ ہم وزیراعظم ءِ پیش کننگا۔ دیوان ءِ پاننگاکہ اینخو مالی سال اکن حکومت نا کنڈآن پبلک سیکٹر ڈویلپمنٹ پروگرام نا رداٹ 380 پوسکن آ اسکیم آتے جاری کننگا۔ وزیراعظم دیوان آن تران کرسا پارے کہ مشکل معاشی حالیت آتیان پد ہم معاشی سوگوی نا دوئی کننگ آن پد حکومت نا پبی کوشست ءِ کہ سوگوی نا بروک آ مرحلہ معاشی شونداری نا شکل اس اختیار کے۔ اوپارے کہ ننا وژن ملک ءِ پائیدار معاشی شونداری نا کسر آ دننگ نا ءِ، ہراڑکن مریس وختی جامع ڈٹ بندی بے کچ اہمیت تخک۔ وزیراعظم پارے کہ مریس وخت و جامع ڈٹ بندی نا رداٹ بین الوزارتی رابطہ و کوآرڈنیشن کلیدی ءُ اہمیت اس تخک۔ وزیراعظم ءِ پاننگاکہ ساڑی حکومت چندی ڈٹ آتا منظوری و منظور مروک ڈٹ آتے کن فنڈ جاری کننگ نا عمل ءِ آسان کرینے تانکہ اسہ ڈٹ اس ہم فنڈ آتا کمتی یا ہرے مننگ نا سوب آن پدسلپ۔ وزیراعظم پارے کہ پبلک سیکٹر ڈویلپمنٹ پروگرام نا رداٹ ڈٹ آتیا وخت آ عمل آن ملک اٹی معاشی عمل ءِ ترند کننگ و روزگار نا زیات آن زیات وارخواہی ودی کننگ اٹ کمک رسینگک۔ دارداٹ وزیراعظم پارت کرے کہ چندی ڈٹ آتیا عملدآمد نا رفتار آ پدریسہ نظر تخنگے و داہیت ءِ پک کننگے کہ اسہ شونداری ڈٹ یا اسکیم اس خیسن آ فیتہ یا پین سوب آتا بناآ تاخیر یا التواء نا گواچی مف۔ وزیراعظم پارے کہ شونداری کاریم تا رداٹ حکومتی وسیلہ غاتے کاریم اٹ اتنگ تون اوار اوار حکومت نجی بشخ ءِ ہم دا عمل اٹ اوار کننگ خواہک و دا چرجوئی ٹی حکومت اوفتے ہروڑ نا آسراتی فراوان کننگ کن پرعزم ءِ۔
