اسلام آباد۔ 23 دسمبر (اے پی پی) پاکستان و جاپان نا نیام اٹ دوشنبے نادے آ داڑے افرادی قوت نا برآمد نا بابت کمکاری نا یات داشت آ دستخط مس، داوخت آ وزیراعظم نا خصوصی کمکار سمندر پار پاکستانی سید ذوالفقار عباس بخاری پارے کہ جاپان نا آبادی کم مننگ ءِ ہنداخاطر جاپان ءِ مین پاور نا گرج ءِ۔ جاپان نا سفیر ماتسوڈاکنیوری تون گپ و تران کرسا اوپارے کہ پاکستان نا 65 درسد آبادی نا وئی 35سال آن کم ءِ، داسہ جاپان اٹی 14بشخ آتے ٹی پاکستان نا لیبرءِ کاریم اٹ اتنگک، داپاکستانی تیکن بھاز جوان ءُ موقع اسے، بروک آ مسہ سال اٹی جاپان ءِ مسہ لکھ کسب کار بندغ آتا گرج مریک۔ سیکرٹری وزارت اوورسیز پاکستانیز عامر حسن و جاپان نا پاکستان اٹی سفیر ماتسو ڈاکنیوری یات داشت آ دستخط کریر۔ کمکاری نا یات داشت نا دو داٹی وزیراعظم نا خصوصی کمکار زلفی بخاری و جاپان نا صدارتی سلاہکار خارجہ امور سنوراکینٹاروئسک ہم ساڑی ئسر۔ وزیراعظم نا خصوصی کمکار زلفی بخاری داوخت آ گپ و تران کرسا پارے کہ او مارچ، اپریل اٹی جاپان نا دورہءِ کیک ہراڑے جاپان ءِ ٹوارزم نا بشخ اٹی سرمایہ کن ہم آمادہ کیک۔ دود انا وخت آ بنجائی سیکرٹری وزارت اوورسیز پاکستانیز عامر حسن گپ و تران کرسا پارے کہ جاپان پاکستان آن مین پاور نا خذمت آتے دوئی کیک، داوخت اسکان 1600 پاکستانی وزارت اوورسیز نا کمک اٹ جاپان آ ہنانو۔ پاکستان اٹی جاپانی سفیر ماتسوڈاکنیوری پارے کہ جاپان ٹیکنیکل بشخ آن مین پاور نا خذمت آتے خواہک، جاپان ءِ مین پاور و لیبر نا کمتی نا مون تروک ءِ، اوپارے کہ کمکاری نا دا یات داشت آن پاکستان و جاپان نا نیام اٹ تعلقداری تا پوسکن ءُ دور اس بناکیک و پوسکن آفریم ورک انا رداٹ السی رابطہ غاتے مون آ دننگ رسینگک۔ اوپارے کہ جاپان پاکستان اٹی سیل وسوات ءِ مون آ دننگ کن ہم است خواہی تخک، داسہ جاپان اٹی پاکستانی تیکن نوکری تا بے شمار وارخواہی ارے۔ جاپان نا صدارتی سلاہکار خارجہ امور سنور اکینٹارو پارے کہ پاکستان و جاپان نا تعلقداریک ہفتاد سال متکن ءُ۔ داوخت آ ہشتاد آن زیات کمپنی پاکستان اٹی کاریم کننگ ءُ، جاپان پاکستان اٹی زرکاری کننگ اٹ است خواہی تخک۔ اودااومیت نا ہم درشانی ءِ کرے کہ پاکستانی کسب کار لیبر جاپان نا شونداری ٹی کڑد اس ادا کیرہ۔ دود اٹی سیکرٹری خارجہ سہیل محمود، وزارت اوورسیز پاکستانیز نا جوائنٹ سیکرٹری شینا علی منصور، اوورسیز پاکستانیز فاؤنڈیشن نا منیجنگ ڈائریکٹر عامر شیخ، بیورو آف امیگریشن اینڈ اوورسیز ایمپلائمنٹ نا ڈائریکٹر جنرل کاشف نور، وزارت خارجہ نا ڈی جی ایسٹ ایشیاء و پیسفک ثمینہ مہتاب ئسک ہم ساڑی ئسر۔
