بھارت جنوری 2019ء آن داوخت اسکان 3000 آن زیات وار لین آف کنٹرول نا خلاف ورزیءِ کرینے، بھارت اٹی ساڑی آ بے چیٹی مودی سرکار نا گام گیج آتا سوب آن ءِ، وزیر خارجہ مخدوم شاہ محمود قریشی نا بیان
اسلام آباد۔ 23 دسمبر (اے پی پی) وزیر خارجہ مخدوم شاہ محمود قریشی پارینے کہ بھارت جنوری 2019ء آن داوخت اسکان 3000 آن زیات وار لین آف کنٹرول نا خلاف ورزیءِ کرینے، بھارت اٹی داوخت آ بے چیٹی ترند ءِ و دا غٹ مودی سرکار نا گام گیج آتا سوب آن ءِ، اینو ہچ کس بھارت نا مقبوضہ جموں و کشمیر اٹی کروک آ 5 اگست نا گام گیج آتون تفپننگ ءِ، جھیڑہ ئی ترمیمی شہریت ایکٹ 2019 نابرخلاف ہم نئے بیرہ بھارت اٹی بلکن مچ آ دنیا ٹی بھارتی برانز کننگ ءُ و داٹی بیرہ مسلمانک اوار افس بلکن داٹی ہمو بندغ آک ہم اوار ءُ ہرادا سمجھرہ کہ بھارت سرکار سیکولر انڈیا نا نظریہ ءِ کھڈ کرینے و ”ہندوراشٹرا“ و ہندوتوا“ نا سوچ ءِ مسلط کننگ انگ ءِ، دابرانز نا چکار ءِ اینک کننگ کن بھارت نا ارادہ خننگ انگ ءِ کہ او لین آف کنٹرول آ وڑانا وڑاٹ شرارت اس کے۔دوشنبے نادے آ بھارت نا کنڈآن کروک آ مسلم مخالف کانود جوڑ کننگ و امن ایمنی نا حالیت آتیا تینا بیان اٹی وزیر خارجہ شاہ محمود قریشی پارے کہ بھارت دا برانز آن چکار ءِ اسہ کنڈ کننگ خواہک، سیز فائر خلاف ورزی تیٹی ودکی مسنے، سیم آ لگوک باڑ ءِ چندی جاگہ غاتیان کاٹ کننگانے، فوج انا بھلو نقل و حرکت اس خننگ انگ ءِ، داغٹ سوب آک امن و ایمنی کن خطرہ نشان تننگ ءُ۔ وزیر خارجہ پارے کہ ننا انٹیلی جنس ادارہ غاک لین آف کنٹرول آ مروک آ دا ڈپلوائمنٹ، بھلو ہن و بر، براہموس میزائل و سپائیک اینٹی ٹینک میزائل آتا تنصیب ءِ رپورٹ کرینو، بھارت نا کنڈآن لین آف کنٹرول نا خلاف ورزی ودانے و و اسہ بیانیہ اس تننگ نا کوشست کننگ انگ ءِ، بھارتی آرمی چیف نا بیان غٹ انا مون آٹے۔ اوپارے کہ ورلڈ کیپیٹل اٹی مروک آ ٹوپلس ٹو اوڑدہی تیٹی ہراتم اوفتا وزیر دفاع و وزیر خارجہ نا واشنگٹن اٹی اوڑدہی مریک و ہراگپ و تران ءِ او کیرہ و او بے سوب پاکستان ناذکرءِ کیرہ، دا اوفتا تینا ناپاک عزم انا درشانی ءِ ہرادے پاکستان مہالو آن مسترد کرینے۔ بھارت نا کنڈآن جنوری 2019ء آن داوخت اسکان 3000 آن زیات وار لین آف کنٹرول نا خلاف ورزی ءِ کرینے، 300 آن زیات خلقت ءِ شست کننگانے، دا مچ آ حالیت آتا پد اٹ ننے امن و ایمنی ءِ شیف و بڑز کننگ نا اسہ سجفوک ءُ بھارتی ڈٹ اس نظر بننگ ءِ۔ اوپارے کہ ہنداخاطران ای سلامتی کونسل نا صدر ءِ داگھڑتی تیان بذریعہ چھٹی، سرجم معلومدار کرینٹ انتئے کہ امن و سوگوی نا رکھ اوفتا چارٹر اٹی اوار ءِ۔ اوپارے کہ ہمو غٹ ملک آتا منت واری ءِ ہرفنگ خواوہ ہرافک کشمیر نا ویل آ ننا توار تون توار ءِ اسٹ کریر۔ وزیر خارجہ ملائیشیا نا وزیراعظم مہاتیر محمد، ترکی نا صدر رجب طیب اردگان و ایران نا کماش آتا ہم منت واری ءِ ہرفے ہرافک کشمیر آ بھاز پیدوار و دوٹوک موقف اس تینا کریر۔ اوپارے کہ داڑتون اوار اوار ای او آئی سی نا ہم منت واری ءِ ہرفنگ خواوہ کہ اونا آجو ہیومن رائٹس کمیشن ننا دیرینہ خواست آتے مون آ تخسا کشمیر اٹی پیلیٹ گن آتا بے تک کاریم اٹ اتنگ نا نوٹس ءِ ہلکونے و دا بابت جاست وپاست نا بناءِ ہم کننگانے۔
