اسلام آباد۔ 23 دسمبر (اے پی پی) وزیراعظم نا خصوصی کمکار حوالکاری وشین کاری ڈاکٹر فردوس عاشق اعوان پارینے کہ عمران خان نا پوسکن آ پاکستان اٹی غٹ اقلیت آتا حق رکھوک ءِ و اوفتے شونداری نا اسہ وڑ وارخواہی دوئی ءِ، آئین پاکستان اوفتا حق انا ضامن ءِ، بھارت اٹی اقلیت آک شہریت نا پرخ و تعصبی کانود نا برخلاف سراپا برانز کننگ ءُ۔ دوشنبے نادے آ تینا ٹویٹ اٹی اوپارے کہ بھارتی شار میدان جنگ نا منظر ءِ پیش کننگ ءِ۔ مودی تینا بدنیتی، بد فطرتی و چالاکی اٹ بھارت اٹی اقلیت آتیا مروک آ ظلم و جور آن دنیا نا چکارءِ اینک کننگ کپک۔ اوپارے کہ بھارت نا الس مودی نا خار انا برخلاف بغاوت کرینو۔ ڈاکٹر فردوس عاشق اعوان پارے کہ مقبوضہ جموں و کشمیر اٹی کیہی تُو آن کرفیو خلوک ءِ، کشمیری مسلمان تا زند آ مرک انا پہرہ ءِ۔ اوپارے کہ امتیازی شہریت نا جھیڑہ ئی کانود مودی نا مسلمان تا برخلاف خار ءِ پک کرینے۔ دنیا ہُننگ ءِ کہ مودی فسطائی ذہنیت تون بھارت اٹی ہندوتوا نا نظریہ ءِ نافذ کننگ خواہک۔
