اسلام آباد۔ 23 دسمبر (اے پی پی) بنجائی وزیر انسانی حق ڈاکٹر شیریں مزاری پارینے کہ اسہ راج اس ہم زالبول آتے واکدار کننگ آن بیدس شون ہلنگ کپک، حکومت اولیتی بنداو تیا زالبول آتا راجی آسراتی کن گام گیج کننگ ءِ۔ داخیال آتا درشانی ءِ او دوشنبے نادے آ زالبول آتا قومی دے انا مناسبت اٹ وزارت انسانی حق اٹی اڈ ہلوک آ دود آن تران کرسا کرے۔ ڈاکٹر شیریں مزاری پارے کہ پائیدار شونداری کن زند انا چندی بشخ آتے ٹی کاریم کروک آ زالبول آتا رکھ المی ءِ۔ حکومت افرادی قوت اٹی زالبول آتا بشخ ہلنگ کن اسہ رکھ ءُ چاگڑد اس جوڑ کننگ کن پرعزم ءِ۔ اوپارے کہ پاکستان زالبول آتا حق اکن چندی جہانی انسانی حق آتا کنونشن آتے پک کرینے و او نن زمواری تے پورو کننگ کن پرعزم اُن۔ اوپارے کہ دا چرجوئی ٹی بنجائی و صوبائی حکومت آتا کنڈآن زالبول آتے بریبری وارخواہی فراوان کننگ کن چندی کانودسازی و انتظامی گام گیج کننگانے تانکہ او زند انا ہر بشخ اٹی کارآمد مننگ کیر۔ دود اٹی وزارت انسانی حق اٹی کاریم کروک آ زالبول آک خاص وڑاٹ بشخ ہلکر۔
