اسلام آباد۔ 23 دسمبر (اے پی پی) خاتون اول بیگم ثمینہ علوی پارینے کہ ننا چناک پوسکن آ پاکستان نا بنداو ءُ، اوفتے جان جوڑ کرسا روشنا آخبت نا تغ تے پورو کننگ مریک، دا چرجوئی ٹی پڈ انا پُوتیان نجات کن ڈی ورمنگ مہم اٹی پبی بشخ ہلسا اودے سرسہب کننگے۔ او بنجائی دارالحکومت اسلام آباد اٹی ارٹ میکو سالانہ پڈ انا پُو تا چٹفنگ نا مہم نا بنائی دود آن تران کریکہ۔ داوخت آ بنجائی وزیر تعلیم و کسبی تربیت شفقت محمود،پارلیمانی سیکرٹری ڈٹ بندی و شونداری کنول شوذب و پارلیمانی سیکرٹری جان جوڑی ڈاکٹر نوشین ئسک ہم تران کریر۔ بیگم ثمینہ علوی پارے کہ بھلو کچ اسے آ چناتے ٹی پڈ انا پُو تا درمان اسہ اہم ءُ گام اسے ہراڑان ننا چناتا جونی و ذہنی افزائش گچین مریک۔ داڑان ایلو مرض آتیان بچنگ تون اوار اوار چناتا تعلیمی و جونی کارکڑدگی ٹی ہم گچینی بریک۔ اوپارے کہ دا پروگرام پاکستان نا پائیدار مثبت شونداری مسخت آتا دوئی کننگ اٹ کمکار و مددگار مریک ہرافتے ٹی سرفہرست جان جوڑی ءِ، چندی مرض آتیان بچنگ کن ڈی ورمنگ اسہ جلد، آسان و رکھوک کسر اسے، داڑان غذائی کاختی و دتر اٹی کمتی نا ویل ءِ مر کننگ اٹ کمک رسینگک۔
