لاہور۔ 23 دسمبر (اے پی پی) صوبائی دارالحکومت لاہور تون اوار مچ آ ملک اٹی بابائے قوم قائد اعظم محمد علی جنا ح نا ودی دے ءِ 25 دسمبر آ جوش و خروش اٹ اڈتننگک، دے انا بناءِ سہب انا نماز آن پد خصوصی دعا و قائد نا روح انا ثواب کن دعا پاتیا کننگک۔ داوخت آ قوم یکجہتی نا عظیم الشان جوزہ نا درشانی ءِ کرسا بانی پاکستان ءِ اونا خذمت و برصغیر نا مسلمان تیکن آجو و وتواجہ وطن پاکستان نا تغ ءِ پورو کننگ کن جہد آ شاندار لوز آتے ٹی خراج عقیدت پیش کیک، صوبائی دارالحکومت اٹی نظریہ پاکستان ٹرسٹ ایوان کارکنان تحریک انصاف لاہور اٹی خصوصی دود ا س اڈ ہلیک ہراٹی کارکنان تحریک پاکستان و دانشور آتیان بیدس چندی بشخ آتیان تعلق تخوک نرینہ و نیاڑی تا بھلو کچ اس بشخ ہلیک۔ پاکستان تحریک انصاف پنجاب ہم یوم قائد اعظم نا وخت آ ”ننا غٹ انا قائداعظم“ نا سرحال آ دود اڈ ایتک۔ ہندی ہوٹل اٹی اڈ ہلوک آ دود اٹی گورنر پنجاب چوہدری محمد سرور بشخ ہلیک، دود اٹی ملکی مذہبی وسیاسی جماعت، اینکرپرسن، کالم نوشتوک آتون اوار ایلو مکتب فکر انا نمائندہ غاتے بٹنگ انگانے۔ ہنداوڑ یوم قائد اعظم نا بابت چندی شارتیٹی ہم دود اڈ تننگک ہرافتے ٹی خصوصی ٹیبلو، ملی نغمہ و تقریر کننگک۔ دود آتے ٹی ترانکار آک قائد اعظم محمد علی جناح نا زند انا چندی بشخ آتے مون آ تخرہ و پاکستان ناجوڑ کننگ نا چرجوئی ٹی اونا جہد ءِ سلام پیش کننگک۔
