کوئٹہ۔ 23 دسمبر (اے پی پی) وزیراعلیٰ بلوچستان جام کمال خان پارینے کہ صوبائی بجٹ نا اسہ بھلو بشخ اس جان جوڑی نا بشخ اکن جتا ءِ، اینخو مالی سال اٹی جان جوڑی نابشخ انا شونداری و غیر شونداری بجٹ 22 ارب روپئی آن زیات ءِ، اوکان پد ہم اگہ دا بشخ الس ءِ درمان نا گچین آسراتی تننگ کپک تو دا است ہسونی اس مریک۔ حکومت ہمو گام گیج آتے پک کیک ہرافتا کمک اٹ طب انا بشخ اٹی گچینی نظر برے و الس ءِ درمان نا پوسکن و گچین آسراتی اوفتا درگہ غا دوبننگ کے، الس محکمہ جان جوڑی و ہسپتال آتا کارکڑدگی ءِ مانیٹر کرسا سوشل میڈیا نا کمک اٹ پاش آن پاش تینا سلاہ نا درشانی ءِ ہم کیرہ، اگہ ہسپتال آتا کارکڑدگی گچین مریک تو الس اوفتا ستاءِ کیک و اگہ گچینی و بدلی بتو تو تنقید ہم کیرہ ہنداخاطران محکمہ ٹی پین ڈائریکٹر جنرل و ہسپتال آتے ٹی ڈپٹی میڈیکل سپرنٹنڈنٹ نا آسامی تیٹی ودکننگک و اختیار آتے شیفکو کہول آ گدریفنگک۔ داخیال آتا درشانی ءِ او دوشنبے نادے آ کماشی ٹی جان جوڑی نا بشخ اٹی اہم بدلی تا کمک اٹ گچینی اتنگ و صوبائی دارالحکومت کوئٹہ ٹی سرکاری ہسپتال آتے ٹی جان جوڑی سفائی و درمان نا آسراتی تیٹی ودکی نا بابت باندات آتا جاچ ءِ ہلنگ کن اہم ءُ دیوان اس اڈ ہلک ہراٹی سنڈیمن صوبائی ہسپتال، بولان میڈیکل کمپلیکس، شیخ زید ہسپتال، ہیلپرز ہسپتال، بے نظیر ہسپتال، فاطمہ جناح چیسٹ اینڈ جنرل ہسپتال و مفتی محمود میموریل ہسپتال نا میڈیکل سپرنٹنڈنٹس، ہسپتال آتا چندی بشخ آتا سروک آک، ایم ایس ڈی کمامدارآتیان بیدس سیکرٹری خزانہ، سیکرٹری سی اینڈ ڈبلیو، ڈی آئی جی کوئٹہ، کمشنر کوئٹہ، ڈپٹی کمشنر کوئٹہ و محکمہ جان جوڑی نا کمامدارآک ساڑی ئسر۔
