اسلام آباد ۔ 20 دسمبر (اے پی پی) وزیراعظم عمران خان پارینے کہ بلوچستان نا الس نا زند اٹی گچینی اتنگ و صوبہ نا راجی و معاشی شونداری حکومت نا اولیتءِ، بنجائی حکومت بلوچستان نا جوڑ جاڑ و شونداری نا رداٹ صوبائی حکومت نا ہر وڑاٹ کمک ءِ کننگ کن پرعزم ءِ ۔ داہیت ءِ او پارلیمانی پارٹی بلوچستان نا ڈل اتون گپ وتران کرسا پارے ہرافک جمعہ نادے آ خصوصی کمکار سردار یار محمد رند انا کماشی ٹی اوڑتون اوڑدہی کریر ۔ ڈل اٹی ڈپٹی اسپیکر قومی اسمبلی محمد قاسم خان سوری، باسک قومی اسمبلی میر محمد خان جمالی، باسک قومی اسمبلی منورہ منیر، صوبائی اسمبلی نا باسک میر نعمت اللہ، سردار بابر موسیٰ خیل، زاہدہ بی بی، عمر جمالی، نصیب اللہ خان و محمد مبین خان خلجی ئسک اوار ئسر ۔ وخت اس کہ خصوصی کمکار سیاسی امور نعیم الحق ہم اوڑدہی ٹی ساڑی ئس ۔ اوڑدہی ٹی صوبہ بلوچستان نا جم اٹنگا حالیت ، شونداری باندات و الس ءِ مون تروک ویل آتیا گپ و تران مس ۔ ڈل وزیراعظم ءِ تینا تینا حلقہ گچین کاری آن تعلقدار باندات آتیا بریف کریر ۔ وزیراعظم ڈل اتون گپ وتران کرسا پارے کہ بلوچستان نا الس نا زند اٹی گچینی اتنگ و صوبہ ٹی راجی و معاشی شونداری حکومت نا اولیت ءِ ۔ وزیراعظم پارے کہ بنجائی حکومت بلوچستان نا جوڑ جاڑ و شونداری نا رداٹ صوبائی حکومت نا ہروڑاٹ کمک ءِ کننگ کن پرعزم ءِ ۔ اوپارے کہ معاشی سوگوی آن پد حکومت نا پبی کوشست ءِ کہ صنعتی عمل ترند مرے و ورناتے نوکری تا زیات آن زیات وارخواہی دوبرے ۔ اوپارے کہ معاشی عمل نا سوگوی و ترندی آن بلوچستان نا ورناتے فائدہ ہرفنگ نا ہم پبی وارخواہی دوبریک ۔ اوپارے کہ حکومت بلوچستان نا ورناتے کسب فراوان کننگ آہم پبی چکار کننگ ءِ ۔ حکومت نا کنڈآن راجی رکھ انا جامع پروگرام ’’احساس‘‘ پروگرام و جان جوڑی انصاف کارڈ انا سوب بلوچستان نا الس خاص وڑاٹ نیزگاری آن زہمی خاہوت آتے آسراتی دوبریک ۔ وزیراعظم گچین مروک آ باسک آتے پارت کرے کہ او الس نا ویل آتے تالان کننگ و اوفتا ایسری کن پبی کڑد ادا کیر ۔
